Doctrine de la penitence publique Et la forme d'icelle ainsi comme elle se practique en l'Eglise des estrangiers à Londres, deuant qu'on vienne à l'excommunication. Ensemble aussi la forme d'administrer la saincte Cene.

❧ DOCTRINE DE LA PENITENCE PVBLIQVE .

ET LA FORME D'ICELLE ainsi comme elle se practique en l'Eglise des estrangiers à Londres , deuant qu'on vienne à l'excommunication .

Ensemble aussi la forme d'administrer la saincte Cene .

DOCTRINE DE LA PENITENCE PVBLIQVE

COmme ainsi soit que toutes choses doyuent estre ordonnées pour edification , en l'Eglise de Iesus Christ & que sainct Paul Apostre nous expose la maniere d'icelle legitime edification , assauoir que si nous voulons edifier quelque chose , nous l'edifions sus le fondement mis de long temps , par les Prophetes & Apostres Certes : si aucune penitence publique doit estre obseruée en l'Eglise , il fault aussi qu'elle ayt sa source en ce mesme fondement , lequel comprent en soy : toute la doctrine Euangelique , affin que ne soyons estimez auoir voulu ordonner quelque chose de nostre propre fantasie .

Or nous disons , la source de vraye repentance estre en ce commandement de IESVS CHRIST , par le quel il est commandé , qu'il fault , celuy qui aura offencé son frere en aucune maniere , estre deuant toutes choses , reconcilié à luy s'il veult son oeuure estre agreable à Dieu , & de cela nous sommes aprins , que si nous en auons offencé plusieurs , il nous fault semblablement estre reconciliez à plusieurs . A cause dequoy , si parauanture nous auons offencé toute L'eglise , ( nous principalement qui sommes ministres d'icelle ) nous en tendons qu'il nous est necessaire d'estre reconciliez auec toute L'eglise . La aussi nous est baillée la maniere de ceste reconciliation que Christ commande , quant il veult que nous allions vers ceux que nous auons offensée , pour estre reconciliez . Et S. Iaques veult que nous recongnoissions nonostre coulpe deuant eux , & que nous leur de mandions pardon : car par le mot de confesser il comprent l'un & lautre . Parquoy ainsi comme il nous fault aller vers noz freres , lesquelz nous auons offencé , recognoistre la coulpe de nostre offence , & demander pardon pour estre reconciliez à eux , il nous fault aussi aller vers toute L'eglise , si nous l'auons aucunement offencée : entant que toute l'assemblée d'icelle est estimée estre vn homme en Iesus Christ , recognoistre la coulpe de nostre offence , & demander pardon de cela , enquoy il est euident qu'elle à esté offencée par nous : affin d'estre reconciliez auec elle .

Nous appellons ceste chose , assauoir estre en ceste maniere reconcilié à L'eglise , penitence publique : En laquelle chose doiuent estre obseruées : premierement en celuy qui apeché , vne vraye de plaisance , & accusation de son peché : à ce que la confession soit vraye , & non hipocritique , derechef vne vraye confirmation en sa foy , d'obtenir pardon de toute sa coulpe , en faueur de Christ : à ce queceste confession soit aussi fructueuse : Puis la publique edification de toute L'eglise par la reconciliation du delinquent auec icelle , attestatoyre de la remission de ses pechez .

Parquoy donc en ordonnant au penitent quelque maniere de retourner à L'eglise , de recognoistre publiquement en son assemblée la coulpe de son peché , & de demander pardon : Il fault tousiours auoir l'oeil principalement à la fin de ceste penitence publique , assauoir à la reconciliation salutaire du frere pecheur auec l'Eglise , donnant tesmoignage de la remission gratuite de ses pechez : affin que le tout , tant ce que le frere delinquant doit faire auec l'Eglise , que ce la que l'Eglise doibt faire auec le frere delinquent , serue totalle ment à ceste fraternelle & salutaire reconciliation , & conduise comme par la main le frere pecheur à icelle , & non pas l'en retire , ou empesche en aucune maniere .

LA FORME DE LA penitence publique .

Premierement en ordonnant la penitence publique doibuent diligemment estre obseruées par les ministres & anciens de l'Eglise , & les vrayes marques de repentance & accusation de soymesmes en son peché , assauoir-mō si le frere delinquent se desplait en soymesme , vrayement & de coeur , pardessus tous les aultres , & s'il n'accuse point les aultres pardessus soy pour amoindrir son peché . Car celuy auquel les aultres desplaisent plus qu'il ne se deplaist soy mesme , principalement en crime publique , lequel aussi accuse les autres pardessus soy , ou s'efforse de les enueloper en semblable peché , affin d'amoindrir les siens , n'a point encore en son coeur vraye desplaisance de son peché .

Que si telles marques de vraye repentance & accusation de soymesme ne sont point veues au frere delinquent : lors les ministres & anciens de l'Eglise , aiantz obserué les degrez d'admonition , procederont à le reieter de la communion de l'Eglise à cause de son impenitence , non ( toutesfois ) sans pleurs & gemissement publique de toute L'eglise . Mais si le frere delinquent donne signification claire & certaine , d'une vraye & chresti enne desplaisance & accusation de soymesme en son peché , aux ministres & anciens de l'Eglise : adonc ilz l'inuiteront fraternellement & amiablement à reconciliation publique auec l'Eglise , iouxte le susdit commandement de Iesus Christ , assauoyr qu'il voyse vers l'Eglise offencée par luy , & ce en l'assemblée publique d'icelle , & qu'il recognoisse deuant elle la coulpe de son offence , qu'il en demande pardon , & qu'il requiere estre derechef nombré entre les membres d'icelle : en cest endroit , lesditz ministres & anciens tant en leur nom comme au nom de toute l'Eglise , presenteront au frere penitent tous offices chrestiens , à la gloyre de Dieu , confirmation de la foy du frere delinquent , & edification de toute l'Eglise . Apres ces choses sera assigné iour au frere delinquent par les Ministres & Anciens de l'Eglise , pour faire penitence publique , lequel sera annoncé à toute l'Eglise , affin qu'elle s'assemble pour receuoir en liesse le frere delinquent faisant penitence , & de donner tesmognage qu'elle se resiouit en dieu , pour ce que par sa grace elle à recouert la brebis , laquelle s'estoit foruoyée . Finalement , le iour auquel le frere delin quent doit estre reconcilié auec L'eglise , il sera presenté par les Ministres & Anciens deuant la face d'icelle , & se fera la predication de la vraye repentance de ceux qui choyent en L'eglise de Iesus Christ , auec prieres publiques de toute L'eglise , pour le frere delinquent . La , apres la predication acheuée auec les prieres , vn des Ministres vsera de la forme d'admonition qui s'ensuit , oyant toute l'Eglise

ADMONITION A L'EGLISE TOVCHANT LE FRERE PENITENT .

Mes freres , suyuant la charge de nostre ministere , nous auons amené en vostre presence cestuy nostre frere delinquent , lequel pour vous donner tesmoignage de sa vraye & chrestienne repentance , est prest de recognoistre & confesser publiquement la coulpe du peché par lequel il à offensé Dieu & son Eglise , à la honte ( certes ) de soymesme : mais à la gloyre de nostre Dieu , & edification de l'Eglise . Lequel aussi desire deuant Dieu estre reconcilié auec vous , & estre retenu pour l'aduenir en fraternité ecclesiastique . Parquoy il fault que soyez admonnestez en cest endroit , par la parolle de Dieu , de vostre deu & office enuers iceluy nostre frere delinquent , afin que vous sa chez ce que vous deuez estimer du peché de cestuy nostre frere delinquent , des vostres & des nostres Ensemble des fautes & cheutes de tout le monde . La saincte escripture nous einseigne deux choses touchant le peché . La premiere est , que nous sommes tous enclos soubz peché . La seconde , que nous sommes ainsi enclos soubz peché , affin que derechef par la misericorde gtatuite de Dieu en IESVS CHRIST , nous soyons tous sauluez , en tant que cela touche Dieu , & non pas affin que nous perissons en noz pechez . Par cela nous apprenous ce que nous debuons iuger de noz pechez , & de ceux des autres , & comme en tel affaire nous deuons estre affectionnez les vns enuers les autres . Car quand nous oyons que sans exception de personne , nous sommes tous enclos soubz peché , nous entendons semblablement que par nature nous sommes enclins en tout genres de vices . A cause dequoy , nous ne nous esmerueillerons point de la cheute des autres : encore moins les accuserons nous , ou contempnerons par dessus nous . Ains nous recognoistrons nostres deu estre , de reputer les cheutes des autres ( tant griefues qu'elles puissent estre ) comme nostre , ne regarderons point tant noz freres delinquens en leurs cheutes comme nousmesmes , nous nous accuserons aussi deuant Dieu auec eulx . Car si vrayement & de coeur nousnous recognoissons tous ensemble estre enclos soubz peché : Il ne se peut faire , que ne confessions les aultres n'auoir commis faute , que nousmesmes n'eussions bien faite , si nous n'en eussions esté preseruez par singulier benefice de nostre Dieu , que nous ne luy rendions graces immortelles , de ce qu'il ne nous laisse point cheoir és crimes , esquelz nous oyons les autres estre tombez : Le priant continuellement qu'il ne nous y permette point trebuchercy apres . Dauantage veu que nous sommes tous enclos & venduz soubz peché , nous deuons pardonner les pechez les vns aux aultres , & supporter en charité fraternelle les fautes les vns des aultres : aultrement nous nous rendons coulpables à nostre grand preiudice , entant que nous accusons & condampnons les aultres par dessus nous , pour les choses lesquelles nous nous recognoissions auoir communes auec eulx .

Derechef quand nous oyons que nous som mes enclos soubz peché , non point affin que nous perissions ( Car Dieu ne veut point nostre perdition , ains que nous soyons sauuez par sa seule & gratuite misericorde en CHRIST , à sa louange & gloyre , non pas par nostre dignité ou de noz oeuures ) nous deuons estimer qu'il ne nous faut point demeurer en noz pechez , esquelz nous no{us} cognoissons estre cheuz , mais incontinent ayant recogneu nostre coulpe , nous retirer vers la misericorde de nostre Dieu , par laquelle il nous à en faueur de son filz vnique , tellement embrassez , qu'il à transporté sus luy toute la coulpe de noz pechez , en luy imputant le tout supposé que nous nous desplaisions en nousmesmes en noz iniquitez , & que nous nous accusions nousmesmes , non pas luy en sa saincte loy & iuste Iugement . Dauantage , que nous confianr à sa seule bonté diuine , & nous deffiant de nousmesmes , ensemble tous d'un acord , nous implorions de tout nostre coeur sa grace salutaire . Or nostre Dieu n'est point tant seuere , ou chagrin en cest endroit , qu'il requiere de nous grand appareil de parolles , pour obtenir sa grace & misericorde . Car il regarde le coeur , & non point l'apparence exterieure des parolles , & si nous desplaisant vrayement en nostre coeur , auec non fainte accusation de nousmesmes , nous demandons sa grace , auec certaine confiance en nostre Seigneur IESVS CHRIST . Certes en ce faisant , il nous regade deuant que nous commencions de crier à luy , & accourt pour nous enbrasser premier que nous ayons dressé accusation à l'encontre de nousmesmes . Incontinent il nous donne la puissance de nous repentir , & faisant la repentance , il nous charge suz les espaules de son filz IESVS CHRIST , affin qu'il nous raporte en sa bergerie . Lors plus grande ioye est demenée en son Royaume , sur vn poure pecheur faisant penitence , que sus nonante iustes , lesquelz autrement au parauant il auoit pour compagnons de son Royaume .

Parquoy donc ( mes freres tresaymez ) puis que ces choses sont telles à la verité , & que vous auez ce frere delinquant deuant vous , qui se dispose de recognoistre auec vraye desplaisance & accusation de soymesme en vostre presence , la coulpe de son peché , en demander pardon à dieu premierement , puis à vous comme à l'Eglise de Dieu , & estre par sa penitence reconcilié auec vous , & retenu en vostre fraternité ecclesiastique . Ioignons maintenant noz pechez auec les siens , estimons sa cheute estre la nostre , & prenons exemple en luy , affin qu'ainsi comme par ceste penitence publique il testifie combien il se desplaist en son peché , nous nous desplaisions aussi aux nostres , & nous accusions auec luy . Assemblons nous , & noz larmes auec les siennes . Escoutons le confessant la coulpe de son peché , & prions Dieu qu'il la confesse vrayement & de coeur , à la gloyre immortelle de son nom , à son salut , & edification de toute l'Eglise .

PRIERE POVR LE FRERE DELINQVENT .

DIEV eternel pere omnipotent & misericordieux , qui par la bouche de ton Prophete as disertement tesmoigné , que tu ne veux point la mort du pecheur , ains qu'il se repente affin qu'il viue . Et qui as voulu tō Filz vnique mourir , non point pour les iustes , mais pour les pecheurs , affin que ceux qui se sentant abatuz par la charge de peché , & qui se deffiant totallement d'eux mesmes , & se confiant seulement à ton filz , viendroyent en humilité deuant le thro ne de ta grace , ne doubtassent aucunement que ilz ne fussent exaucez de toy . Voicy nous sommes conuenuz ensemble au nom d'iceluy ton Filz nostre seigneur IESVS CHRIST , pour accuser noz pechez deuant ton regard , & te demander pardon d'iceux , au nom de ton Filz . Nous te prions donc humblement ( pere tresdoux ) que premierement tu incites par ton S. Esprit , les coeurs de tous nous à vraye cognoissance de noz pechez . Principalement le coeur de cestuy nostre frere delinquent , lequel ainsi comme par son peché il à offencé toute nostre Eglise , estant constitué au ministere d'icelle , ne refuse point aussi recognoistre publiquement la coulpe d'iceluy , à la gloire de ton sainct nom , & edification de ceste tienne Eglise : apres que tu pardonnes à cestuy nostre frere la coulpe de son peché par luy recogneuë , en faueur de ton Filz bien aymé : & qu'aussi tu nous pardonnes les nostres : & nous gouuerne au temps à venir tous ensemble par ton esprit , & nous fortifie tellement que ( iaçoit que nous ne pouuons estre sans peché ) nous ne choyons point toutesfois en crimes semblables , par lesquelz ton nom adorable soit blasmé , l'Euangile de ton filz diffamé , le ministere de ta diuine parolle deshonnoré , & ton Eglise dissipée . Deliure nous ( seigneur Dieu ) de telz crimes , pour l'amour de ton filz , & nous arme par ta vertu diuine en nostre Infirmité , contre la tyrannie de peché , afin qu'en saincteté & iustice , nous auancions ton royaume , en l'euangile de ton Filz , auquel auec toy & le sainct Esprit en trinité & vnité diuine , soit louange , honneur , & gloire eternellement .

ADMONITION AV FREre penitent , apres la priere acheuée .

FRere , vous auez desia entendu quel est vostre deuoir enuers l'Eglise offensée par vous , assauoir de recognoistre la coulpe de vostre peché , & en demander pardon , à ce que par ce moyen vous soyez reconcilié auec elle . Vous auez aussi bien ouy , quel est l'office d'icelle enuers vous , son frere delinquent & penitent assauoir , qu'elle conioigne vostre peché auec les siens , qu'elle estime vostre cheute comme sienne , qu'elle assemble ses prieres pour vostre peché , auec les vostres , & ses larmes semblablement , qu'elle auec vous demande la grace de Dieu .

Vous voyez toutes ces choses auoir ia esté faictes par ceste nostre Eglise , par ceste priere publique , laquelle maintenant vous auez ouy . Par quoy il fault que faciez ce que vous auez entendu estre de vostre debuoir , assauoir de recognoistre volontairement la coulpe de vostre peché , & en demander pardon , non point ayant esgard à nous , ou a l'homme quelconque , ains à la gloire de Dieu .

Parquoy donc ( mon frere ) descendez en vousmesmes , & regardez & esprouuez vostre coeur deuant dieu , auquel toutes choses sont cogneues . Pensez que vous estes deuant luy , & non pas seulement deuant les hommes , estimez qu'en nostre ministere vous auez affaire auec Dieu mesme , non pas seulement auec nous , & que nous pouuons estre deceus de vous , entant que nous sommes hommes , mais DIEV ne peut estre deceu , ny de vous , ny d'aucun homme : d'auantage qu'il ne laissera point sans estre puny celuy qui s'efforcera de le tromper en ses Ministres . Regardez donc ( mon frere ) de ne point abuser le sainct Esprit en nostre ministere . Certes nous rendons seulement tesmoignage des choses que nous voyons par dehors : Mais il cognoit les plus profondz secretz du coeur . Et aussi il à monstré par griefz exemples , qu'il ne veut point laisser impuny , celuy qui le veut abuser en son ministere ecclesiastique . Donnez donc ( mon frere ) gloire à Dieu , en vraye & chrestienne deplaisance & accusation de vostre peché . Donnez argument de vostre vraye & Chrestienne repentance , par volontaire recognoissance de vostre coulpe . Car ceste est la gloyre de Dieu , qu'auec accusation de nous-mesmes , nous implorions tous sa grace au nom de son Filz vnique , & que par sa misericorde nous soyons sauuez , laquelle chose nous vueille octroyer celuy qui est vn seul Dieu en trinité , Pere & Filz , & S. Esprit . Amen .

En cest endroit le frere penitent fera confession publique de son peché & offence , recognoissant sa coulpe deuant tous , & demandant pardon , & demandera d'estre nombré entre les membres de l'Eglise . Or quand il aura fini sa confession , le Ministre luy fera l'admonition qui s'ensuit : mais que sa confession soit telle qu'en icelle ne soit trouué que redire par aucuns des Ministres de l'Eglise .

ADMONITION AV FREre penitent , apres sa confession .

FRere , nous auons ouy vostre confession , la quelle nous ne doubtons point auoir esté vraye & chrestienne : pour laquelle chose nous nous resiouissons grandement , deuant Dieu , & son Eglise . Et rendons graces à sa diuine bonté de vostre repentance , en laquelle vous ne vous estes point faict tant grande honte , ne à vostre infirmité , comme à Sathan , par la victoire obtenuë de vous par Iesus Christ , à l'en contre de luy , & de peché . Car veritablement nous vaincons Sathan & l'ahontissons auec toute sa tyrannie , ou pour mieux dire IESVS Christ le surmonte en nous : toutesfois & quantes que nous accusons noz pechez , & en iceux Sathan qui en est l'Autheur en nous , auec l'inuocation de la grace diuine . Cognoissez donc , en ceste accusation de vostre peché , & de Sathan , le benefice de nostre Seigneur Iesus CHRIST à l'endroit de vous . Car ce n'est point vous ( mon frere ) qui auez faict cest oeuure : mais c'est Iesus CHRIST qui l'à faict en vous par son Esprit , à sa gloire , & consolation de tous nous . Cognoissez ( dis-ie ) ce benefice de Iesus Christ en vous : & gardez d'en abuser à vostre condemnation , pour vous donner tropt de licence en voz pechez . Pensez que Sathan sera faché , de la honte qu'il reçoit en ceste vostre penitence , à cause dequoy il cherchera tous moyens , pour derechef vous surprendre & enlacer . Gardez vous donc ( mon frere ) de luy permettre entrée sus vous , de peur que les choses dernieres , ne soyent faictes pires que les premieres . Priez Dieu incessamment , qu'il vous gouuerne par son sainct Esprit , & qu'il vous fortifie & munissede ceste armeure que sainct Paul escrit , à ce que ne soyez oprimé par les finesses & assautz de Sathan . Dieu est fidele qui fera cela , si nous l'inuoquons vrayement & de tout nostre coeur . Donnez vous donc entierement à luy , iettez vostre esperance certaine sus luy , recommandez vous à luy de tout vostre coeur . Car par ce moyen il sera faict , qu'ainsi comme Sathan n'a rien en nostre chef Iesus Christ : aussi il ne pourra rien auoir en vous , n'y en nous qui sommes ses membres .

Admonition à l'Eglise .

FReres , prenez tous ensemble exemple a cestuy nostre frere penitent , à ce que vous vous desplaisies vrayement en voz pechez , que vous vous accusies en iceux , & qu'auec luy vous implories en toute humilité la misericorde diuine . Pardonnez luy toutes les offences qu'il à commises enuers vous : comme vous voulez voz pechez vous estre pardonnez de Dieu . Recognoissez le pour vostre frere deuant Dieu , & soyez reconciliez à luy de tout vostre coeur . Et afin que il puisse auoir certaine signification de vostre bon coeur enuers luy : mettons nous tous à genoulx , & rendons tous ensemble graces à nostre Dieu , pour la repentance de nostre frere .

ACTION DE GRACES .

PEre celeste fontaine inepuisable de toute misericorde & consolation , nous sommes indignes d'estre regardez de toy , tant s'en faut que ne soyons dignes d'estre ouys , encore moins d'estre nombrez estre tes enfans , & embrassez de ta faueur paternelle . Mais quand nous regardons ta bonté & misericorde indicible enuers nous , en faueur de ton filz IESVS Christ nostre Seigneur , par laquelle tu ne nous permetz point perir , ores qu'ayons merité la mort eternelle , & là meritons tous les iours , auez ains amiablement nous rappelles à repentance , & nous ayant remis toute la coulpe de noz pechez nous , reçois derechef en ta grace vrayement paternelle , pour lamour de ton filz IESVS CHRIST , & de son merite . Nous ne pouuons aultrement faire , que louer de tout nostre coeur ceste tienne bonté immense & pour icelle te rendre graces immortelles . Parquoy maintenant pere , tressainct , nous te louons ensemble auec ton filz & le sainct Esprit , nous t'adorons , nous te rendons graces pour ce don de repentance vrayement salutaire , que tu as fait à nostre frere , & humblement prosternez deuant tes piez que tu nous vueilles tousiours faire don en tous noz pechez à ce par nostre accusation de nousmesme & nostre honte , ta vertu & gloyre soit esclarcie en nostre infirmité , & que retirez de la puissance des tenebres & transportez au regne de ton filz , nous soyons entez en luy comme bonnes branches , & purgez par ton sainct Esprit , tous les iours nous produisions en luy fruictz plus abondans par ta grace , à la gloire de ton sainct nom & edification de ton Eglise , par iceluy IESVS CHRIST nostre seigneur Amen .

L'action de graces finie , le Ministre demandera au frere penitent , si iouxte la parolle de Dieu , il ne se veut pas bien submetre pour l'aduenir à la discipline Ecclesiastique , & apres qu'il aura respondu affirmatiuement , ledict Ministre luy annoncera remission de son peché , deuant Dieu & son Eglise , Cela fait , les Ministres & Anciens baiseront en bon ordre le frere penitent , pour luy donner tesmoignage de leur reconciliation auec luy , & de celle de toute l'Eglise . Apres , toute l'Eglise chantera vn Pseaume d'action de graces & louange . Puis le Ministre ayant beneit l'assemblée , la renuoyra en paix .

Il nous à semblé que ceste simple maniere de penitence publique deuant que venir à l'excommunication est suffisante , à cause qu'elle comprent abondamment la salutaire reconciliation du frere penitent auec l'Eglise , & qu'elle sert a l'edification d'icelle , & consolation de tout frere delinquent . Lesquelles choses doiuent estre principalement considerées en l'usage legitime de la penitence & discipline ecclesiastique . Autrement ces marques exterieures , qu'on a de coustume de mesler auec la penitence publique , ne sont point du tout sans superstition , & deçoyuent bien souuent par leur hypocrisie les iugemens de plusieurs , Dauantage elles ne seruent pas beaucoup a edification , ains appartiennent plustost au iugement du Magistrat politique , qu'à l'obseruance de la discipline ecclesiastique .

❧ L'ORDRE ET FOR ME Q'VON TIENT POVR CELEBRER LA SAINCTE Cene de nostre Seigneur Iesus Christ .

PRemierement le iour solennel , plus prochain de celuy auquel on doit celebrer la Cene , est aduerty le peuple , de se preparer pour le iour ordonné à ladite Cene , & pour aider à ceste preparation , on fait le sermon , d'icelle , ou a tout le moins on en touche quelque point .

Le iour auquel la Cene se celebre , le peuple estant assemblé , tout , ou en partie , premier que commencer le sermon on coeuure la table , & pose on dessus le pain en vn grand plat , & sont deux petis platz des deux costez , pour dedans iceux mettre les fragmens du pain que rompra le Ministre , pour distribuer aux assistans , on met aussi les vaisseaux de verre sur la table , pour distribuer le vin .

Apres , le Ministre monte en la chaire , ou ayant fait la confession des pechez , & asseure le peuple que l'absolution , & remission d'iceux est faicte par la misericorde de Dieu , en faueur de Iesus Christ à tous croyantz , il fait chanter vn psalme : puis fait toute la predication du mistere de la Cene & de ses fruictz , laquelle predication finée il fait les prieres acoustumées , puis fait chanter veni creator , en langue vulgaire , ou le symbole des Apostres , ou quelque autre psalme , & en la fin declaire que nul des Ministres , Senieurs , ou Diacres , ne des autres freres , n'est trouué inydoine , ou indigne , qui au Iugement humain , nepuisse communiquer à la saincte Table de Iesus Christ , puis admoneste le peuple , d'aimer , retenir , & embrasser , l'usage de la discipline ecclesiastique , foit en admonestant & aduertissant ceux qui pechent , ou receuant en humilité , & propos da'mendement , les corrections des autres , leur remonstrant aussi , que s'ilz ont esté parauant negligens , ou contempteurs , de l'une de ces choses , qu'ilz s'en repentent presentement de tout leurs coeurs : & deliberent se mieulx porter à l'aduenir , attendu que celuy seroit indigne de la table de IESVS CHRIST , qui de fait & de courage mespriseroit , & seroit nonchallant en telle choses .

Ce fait , le Ministre inuite l'Eglise à prier , & à suiure de leurs coeurs ses parolles , puis dit pour soy , & pour toute l'Eglise : Dieu eternel & tout puissant , qui aduances & illustres continuellement la gloire de ton filz vnicque entre nous , voicy qu'en ensuiuant sa doctrine nous sommes assemblez , afin de celebrer ces benefices lesquelz il nous à acquis par sa mort , à la gloire de son nom & du tien .

Parquoy nous te prions tres humblement , pere tressaint , par iceluy ton filz , que tu vueilles estre present auec luy , & le saint Esprit , en ceste nostre action , & faire par ta vertu diuine que nous ia receuz en la societé d'un corps , auec iceluy tō filz , laquelle il nous à donnée par la communion de son corps , & de son sang , nous puissions estre vn auec toy : comme auec luy , & estre par foy auec l'usage de ceste Cene , tous les iours confirmez de plus en plus en ceste vnion , voire & exprimer & declarer par ceste imitation de tō filz , l'image d'icelle deuant toute l'Eglise , besongnant pour cela en nous ton S. Esprit . Car ainsi tous seront contraintz confesser que nous auons ia commencé estre tes enfans , apres nous auoir veuz estre gouuernez & conduictz par ton esprit : & que le sainct nom de ton filz , & le tien , est glorifié entre nous . Lequel doit estre loué à tousioursmais . Ainsi soit il .

L'oraison finée , le Ministre exhorte le peuple , qu'un chascun s'esprouue soymesme , iouxte le dire de sainct Paul en la premiere aux Corintes onziesme Chapitre , & fait ladite exhortation selon que le seigneur Dieu luy donne par son esprit , & luy enseigne par sa parolle , ou s'il luy plaist il recite celle qui s'ensuit , & dit .

Mes freres , qu'un chascun s'esprouue & examine sa conscience , pour sauoir s'il sent sa misere , & la pesanteur de ses pechez , & s'il en a vraye repentance , desirant de viure d'oresnauant sainctement & selon Dieu , sur tout s'il à sa fiance en la misericorde de Dieu , & cerche entierement son salut en Iesus CHRIST : croyant que le pere luy veut estre propice en faueur de sō filz IESVS , & aussi , si en renonçant à toutes inimitiez & rancunes , à bonne intention & courage de viure en concorde & charité fraternelle auec ses prochains .

Si nous auons ce tesmoignage en noz coeurs deuant Dieu , ne doutons nullement qu'il ne nous aduouë pour ses enfans , & que le seigneur IESVS n'adresse sa parolle à nous , pour nous introduire à sa table , & nous presenter ce S. sacrement , lequel il à communiqué à ses Disciples . Et combien que nous sentions en nous beaucoup de fragilité & misere : comme de n'auoir pas la foy parfaite , mais estre enclins à incredulité & defiance , comme de n'estre point entierement si adonnez à seruir à Dieu , & d'un tel zele que nous deurions : mais auoir à batailler iournellement contre les concupiscences de nostre chair , neantmoins puis que nostre seigneur nous à fait ceste grace , d'auoir son euangile Imprimée en nostre coeur , pour resister a toute incredulité : & nous a donné ce desir & affection , de renoncer à noz propres desirs , pour suiure sa Iustice & ses sainctz commandemens , soyons tous certains , que les vices & imperfections qui sont en nous , n'empescheront point qu'il ne nous reçoiue & nous face dignes d'auoir part en ceste table spirituelle . Car nous n'y venons point pour protester que nous soyons parfaitz ne iustes en nousmesmes : mais au contraire en cerchant nostre vie en IESVS CHRIST , nous confessons que nous sommes en la mort . Entant donc , que ce sacrement est vne medecine pour les paoures malades , & que toute la dignité que nostre seigneur requiert de nous : c'est de nous bien recongnoistre , pour nous desplaire en noz vices , & auoir tout nostre plaisir ioye & contentement en luy seul .

Premierement donc , croyons à ces promesses , que IESVS CHRIST qui est la verité infallible à prononcé de sa bouche : assauoir qu'il nous veut vrayment faire participans de son corps & de son sang , à sin que nous le possedions entierement , en telle sorte qu'il viue en nous , & nous en luy , & combien que nous ne voyons que du pain & du vin , toutesfois que nous ne doutions point , qu'il accomplit spirituellement en noz ames , tout ce qu'il nous demonstre exterieurement , par ces signes visibles : c'est à dire , que il est le pain celestiel pour no{us} repaistre & nourrir à vie eternelle , ainsy que nous ne soyons point ingratz à la bonté infinie de nostre sauueur lequel desploye toutes ses richesses , & ses biens , en ceste table , pour nous les distibuer . Car en se donnant à nous , il nous rend tesmoignage que tout ce qu'il à est nostre . Pourtant receuons ce sacrement comme vn gage , que la vertu de sa mort & passion nous est imputée à Iustice , tout ainsi que si nous l'auions soufferte en noz propres personnes . Que nous ne soyons point donc si peruers , de nous reculer , ou IESVS CHRIST nous conuie par sa parolle . Mais en reputant la dignité de ce don precieux qu'il nous fait , presentons nous à luy d'un zele ardant , à fin qu'il nous face capables de le receuoir .

Pour ce faire , esleuons noz espritz & noz coeurs en haut , ou est IESVS CHRIST en la gloire de son pere : & dont nous l'attendons en nostre redemption , & ne nous amusons point à ces elemens terriens , & corruptibles , que nous voyons à l'oeil , & touchons à la main , pour le cercher la , comme s'l estoit enclos au pain ou au vin . Car lors noz ames seront disposées à estre nourries & viuifiées de sa substance , quand elles seront ainsi esleuées pardessus toutes choses terrestres , pour atteindre iusques au ciel , & entrer au Royaume de Dieu ou il habite . Cōtentōs nous doncques , d'auoir le pain & le vin pour signes & tesmoignages certains , spirituellement la verité ou la parolle de Dieu promet que nous la trouuerons . Cela faict , le Ministre faict la confession de foy , comme elle est contenue au symbole des Apostres , voire si ledit symbole n'a point esté chanté au parauant , pour testifier au nom de tout le peuple , qu'il veulleut tous viure & mourir en la foy & confession de la doctrine & religion chrestienne .

Puis le Ministre recite l'institution de la Cene escrite en la premiere aux Corinthiens . 11. Chapitre : & dit à haute voix . Escoutons comme IESVS CHRIST à Institué sa saincte Cene , selon que sainct Paul le recite au Chapitre . 11. de la premiere epistre aux Corinthiens .

I'ay rcceu , dit-il , du seigneur ce que ie vous ay baillé , C'est que le seigneur Iesus , en la nuit qu'il fut liuré , print du pain , & apres auoir Rendu graces le rompit & dit : Prenez , mangez , cecy est mon corps , qui est Rompu pour vous . Faites cecy en memoire de moy . Semblablement apres auoir souppé , print le calice disant : Ce calice est le nouueau Testament en mon sang : faites cecy toutesfois & quantes que vous beuurez en memoire de moy . C'est que quand vous mangerez de ce pain , & beuurez de ce calice , vous annoncerez la mort du seigneur , Iusques a ce qu'il vienne . Pourtant quiconque mangera de ce pain , ou beuura de ce Calice indignement , il sera coulpable du corps & du sang du Seigneur . Mais que l'homme s'esprouue soy mesme & ainsi qu'il mange de ce pain & boyue de ce calice . Car quiconque en mange & boit indignement , il prent sa condamnation , ne discernant point le corps du seigneur .

Cela dict , il adiouste ce qui s'ensuit .

Nous auons ouy mes freres , comme nostre Seigneur fist sa Cene entre ses Disciples : & par cela nous demonstre que les estrangers , & ceulx qui ne sont pas de la compagnie de ses fideles , n'y doiuent point estre admis . Parquoy suiuant ceste reigle , au nom & en l'authorité de nostre seigneur Iesus Christ , I'excommunie tous Idolatres , blasphemateurs , contempteurs de Dieu , heretiques , & toutes gems qui font sectes apart : pour rompre l'unité de l'Eglise , tous pariures , tous ceux qui sont rebelles a peres & à meres , & a leurs Superieurs : tous seditieux , mutins , batteurs , noiseux , adulteres , paillardz , larrons , rauisseurs , auaricieux , yurongnes , gourmans , & tous ceux qui meinent vie scandaleuse & dissolue : leur denonçant qu'ilz ayent a s'abstenir de ceste saincte Table , de peur de polluer & contaminer les viandes sacrées , que nostre Seigneur Iesus Christ ne donne sinon à ses domestiques & fideles .

Apres ces choses , le Ministre inuite tout le peuple a venir en bon ordre à la saincte Cene , & leur dict a haute voix .

Nostre pasque , assauoir Christ , a esté sacrifié pour nous : parquoy mangeons en , non point en leuain viel , n'en leuain de mauuaistié & de malice . Mais en pains sans leuain , qui soyent de pureté & de verité . Ainsi soit il .

Cela dict , le Ministre se sied au milieu de la Table , & les aultres Ministres , & Senieurs de l'Eglise , & aussi les Diacres , ( si la table les peut tous receuoir ) . Et lors rompant le pain , & en baillant tant a ceux qui sont proches a ses costez , comme aussi dans les deux petis platz , a tous les autres de la table il dict .

Ayez tous memoire que le corps de nostre seigneur IESVS CHRIST , à este baille à la mort pour nous , en remission de noz pechez . Prenez & mangez , car le pain que nous rompons , c'est la communion du corps de Christ , en la vie eternelle . Puis quant tous ceulx de la table , ont pris le pain , le Ministe prent les vaisseaulx ou est le vin , & les distribue à ceux qui sont plus proches de luy : afin que tous par ordre prennent le vin , & en baillant lesdictz vaisseaux il dit .

Ayez tous memoire , que le sang tresinnocent de IESVS CHRIST , à esté repandu pour la remission de noz pechez . Prenez & beuuez , car la couppe de benediction que nous benissons , c'est la communion au sang de IESVS CHRIST , en la vie eternelle .

Ainsi ce faict a toutes les assietes nouuelles de peuple , & ce pendant quelque Ministre , ou Senieur , lit en la chaire le . 6. Chap. de S. Iean le 9. de la . 1. au Corinth . & quelques autres textes conuenables a l'action . Puis quand tous ont Communié , le Ministre dit a toute l'Eglise . Croyez tous ensemble par le tesmoignage de ceste Cene , que vous auez certaine & salutaire Communion auec Iesus CHRIST : en son corps & en son sang , a la vie eternelle . Adonc il inuite tout le peuple a rendre graces au Seigneur , & suiure de leur cueur ses parolles , & dit .

Dieu tout puissant , & pere misericordieux , nous te rendons graces par IESVS CHRIST ton filz nostre Seigneur , de ce que tu nous as repu●ez dignes , de nous refectionner des viandes mistiques d'iceluy , pour la confirmation de nostre foy , & ce afin que nous deplorez , esclaues de peché , & de mort , soyons asseurez par la communion d'iceluy , ton filz auec nous , & de nous auec luy , en vn mesme corps & sang que nous sommes tes enfans par adoption , ainsi comme par nature il est ton filz , & dauantage que par ta misericorde indicible tu es nostre pere , ainsi comme tu es le sien , supposé que par nostre mespris , & impieté deliberée , nous ne violons point ceste communion qu'il nous à donnée auec luy . Et pource que retenir en noz espritz , ce tresor inestimable de nostre Communion auec ton filz , excede de beaucoup les forces de noz foibles vaisseaux , veu que ordinerement nous tombons , & sommes enclins a tout genre devices . Nous te prions humblement ( pere tres benin ) par iceluy ton filz , qu'ainsi comme par ta bonté immense , tu eslis les choses basses & contemptibles , afin que par icelles tu mettes en lumiere , & esclarcisses à merueilles ta puissance diuine , tu ne defaille point a nostre infirmité , puis que tō filz la receuë en soy : ains gouuernes & conduises noz pensées par ton , esprit , tellement que le monde , & son prince Sathan , sentent que tousiours tu nous es present en noz tentations & cheutes , à ce que nous ne succombions aucunenement , & que nous ne soyons point priuez de la communion de ton filz , que tu nous as donnée . Ceste nostre communion est de ton don ( pere tressaint ) par lequel tu nous as gratuitement adoptez tes enfantz . Garde donc , & couronne en nous , iouxte ta bonté & misericorde ce tien don . Il n'y à rien en nous de refuge , de force , ou esperance . A ceste cause , nous t'inuocquons , nous t'appelons , nous nous retirons vers toy ( pere tout puissant ) & nous rendons du tout à ta sauuegarde , par la confiance du merite de ton filz , & de nostre communion auec luy . Nous implorons ta grace , & nous enclinons entierement dedans le sein de ta misericorde , estans asseurez , que tu ne mespriseras point en nous le sang de tō filz , auec lequel & le saint Esprit tu vis eternellement .

Ainsi soit il .

Icy le Ministre admonneste le peuple , de perseuerer en la grace de Dieu , & monstrer par integrité de vie , qu'il ne mesprise point les benefices de Dieu , a fin que Sathan ne retourne en eux auec sept autres espritz , & que leur fin soit pire en eulx que la passée : puis on chante , nunc dimitis , en langue vulgaire , & en la fin , le Ministre donne congé au peuple , disant .

Le Dieu de Paix , vous sanctifie entierement , & voz espritz entiers , & ames & corps soyent conseruez sans reproche , en la venue de nostre Seigneur Iesus Christ , auec lequel nous a esté donnée la Communion de tout son merite , sa iustice , & suffisance . Or celuy qui vous a appellez est fidelle , qui aussi le fera , allez en paix , le Seigneur vous preserue de tout mal , & vous conduise en la vie eternelle , Ainsi soit il . 1552