The p[ar]lyament of deuylles This text is an enriched version of the TCP digital transcription A09015 of text S110251 in the English Short Title Catalog (STC 19305). Textual changes and metadata enrichments aim at making the text more computationally tractable, easier to read, and suitable for network-based collaborative curation by amateur and professional end users from many walks of life. The text has been tokenized and linguistically annotated with MorphAdorner. The annotation includes standard spellings that support the display of a text in a standardized format that preserves archaic forms ('loveth', 'seekest'). Textual changes aim at restoring the text the author or stationer meant to publish. This text has not been fully proofread Approx. 24 KB of XML-encoded text transcribed from 9 1-bit group-IV TIFF page images. EarlyPrint Project Evanston,IL, Notre Dame, IN, St. Louis, MO 2018 A09015 STC 19305 ESTC S110251 99845835 99845835 10761 2240929218

This keyboarded and encoded edition of the work described above is co-owned by the institutions providing financial support to the Early English Books Online Text Creation Partnership. Searching, reading, printing, or downloading EEBO-TCP texts is reserved for the authorized users of these project partner institutions. Permission must be granted for subsequent distribution, in print or electronically, of this EEBO-TCP Phase II text, in whole or in part.

 Early English books online. (EEBO-TCP ; phase 2, no. A09015) Transcribed from: (Early English Books Online ; image set 10761) Images scanned from microfilm: (Early English books, 1475-1640 ; 138:12) The p[ar]lyament of deuylles [16] p. Enprynted by Wynkyn de worde, prynter vnto the moost excellent pryncesse my lady the kynges moder, [[London] : The yere of our lorde. M.CCCCC. [and] ix. [1509]] In verse. With a title-page woodcut. Imprint from colophon. Signatures: [A]⁴ B⁴. Reproduction of a photostat of the original in the Henry E. Huntington Library and Art Gallery. eng Jesus Christ -- Poetry -- Early works to 1800. eebo The p[ar]lyament of deuylles [no entry] 1509 17 3702 2 0 0 0 0 0 5.4 B The rate of 5.4 defects per 10,000 words puts this text in the B category of texts with fewer than 10 defects per 10,000 words. 2008-01 Assigned for keying and markup 2008-01 Keyed and coded from ProQuest page images 2009-07 Sampled and proofread 2009-07 Text and markup reviewed and edited 2009-09 Batch review (QC) and XML conversion
The parlyament of deuylles

AS Mary was grette with Gabryell And had conceyued and borne a chylde All the deuylles of the erthe / of the ayre and of hell Helde theyr parlyament of that mayde mylde What man had made her wombe to swell To tempt her ye tende to sylde Her chyldes fader who can tell Who dyde with her tho werkes wylde In hell the fendes tho answered We knewe neuer fader that he had But amonge prophetes we haue lered That god with man had conuenaunt made A serpent in desert was rered So shall goddes sone in man be had The soule of hym shall be vnspered His herte to cloue and he forblad These prophetes speke so in myst What they ment we neuer knewe They spake of one sholde hyght Cryst But Maryes sone hyght Ihesu And they sayd the Cryst with god sholde be atwyst But this Ihesu neuer in the godhede grewe We ben begyled all with our lyst The clothe is all of another hewe And though god make his parlyment Of peas / mercy / trouthe / and reason And from heuen to erthe his sone be sent In mankynde to take a ceason We shall ordayne by one assent A preuy counceyle all of treason And clayme Ihesu for our rent For that he is kynde of man it is good cheson Wryte we his name whyder we spede Sychen to vs he is vnknowen For though he be come of straunge sede Yet in Adams grounde was he sowen Whan he is type do we our dede Loke that we do hym repe and mowne For though god hym selfe our rolles rede By ryght we chalenge Ihesu for our owne To me mayster deuyll it lyes To Ihesu wyll I take hede To nourysshe hym in fantasyes His freyle flesshe bothe to clothe and fede And though that he be neuer so wyse Yet out of the way I wyll hym lede And make of hym bothe fole and nyse And in hell his soule brede Thus the deuylles theyr wyles cast With theyr argumentes grete And thyrty yere they founded fast To tempte Ihesu in many an hete In to a wyldernes with Ihesu I past Of hym knowlege for to gete And forty dayes there dyde he fast Without slepe drynke or mete The mayster deuyll wonder thought Of Ihesus worthy compleccyon By mannes fode lyued he nought But by prayer and deuocyon But whan he hongred as me thought To tempte hym than I made me bowne Lo here ben stones harde wrought Make therof breed to mannes foysowne Forsothe Ihesu sayd not onely in brede Is veryly mannes propre lyuynge But euery worde of the godheed To body and soule is confortynge Vpon an hygh pynacle I hym brought anone And left hym there and adowne I spronge And sayd saue the harmeles bothe lymme & bone And do now maystryes whyle thou arte yonge If thou be goddes sone lete se Of the is wryten longe agone Aungelles in hondes sholde bere the Leest thou spurne thy fote at a stone Ihesus sayd in holy wryte thou mayst se Tempte not thy lorde god lyuynge alone With all thy myght in euery degre Thou shalte hym serue and other none The deuyll sawe it myght not gayne Of Ihesu his purpose he gan mysse He brought hym to an hygh mountayne And badde hym do as he wolde wysse And there he shewed hym for certayne Iewelles rychesse and worldly blysse Worshyp me here and become my swayne And I shall gyue the all this Go Sathanas from blysse thou hye From heuen ryche that ryall toure In Exody it is wryten certaynly Thyn lorde god thou shalte honoure Alas quod the deuyll how arte thou so wytty Thy wordes are bytter / thy werkes are soure Thy conclusyon knytteth me so feruently I abode neuer so sharpe a shoure The deuylles gadred theyr grete frame And helde theyr parlyament in the myst . One wolde ryfle vs at hame And gadre the floure out of our twyst New Iaylours wolde wayte vs shame One men called hym Iohan baptyst But now he hath torned Ihesu is his name That fyrst hyght Ihesu now is Cryst Laugh ne sporte I hym neuer sawe But in stablenes he is alway And straytly kepeth goddes lawe And strongly withstandeth myn affray To werkes of vyce he wyll not drawe A wonders worde I herde hym say The grete temple he wolde downe thrawe And reyse it agayne on the thyrde day Whan he was borne wonders befell Ouer all was peas bothe eest and west In Rome of oyle there spronge a well From trystmer to tyber it ranne prest In Rome the temples downe fell Theyr mawmettes dyde all to brest Aungelles to shepeherdes glory gan tell In erthe to all mankynde bothe peas and rest The emperoure in Rome stode hye Thre sones in one he sawe shynynge clere In the myddes of them a mayden he sye A man chylde in her armes dyde bere The emperour and Cybyll spoken prophecye And they accorded bothe in fere And sayd goddes sone mankynde sholde bye It is a token the tyme draweth nere Also thre kynges came from ferre To worshyp Ihesu all they sought Whiche rey●ed Herodes hette therre Hym to sle for they so wrought By the lyghtnynge of a sterre To Ihesu all thre presentes they brought Homewardes an aungell taught them nerre Another way than they had thought Than I counceyled Herode within a whyle To dystroye the formest prophecy That all men chyldren in towne and pyle To sle them that Ihesu myght with them dye He fledde in to Egypt in that whyle Theyr mawmentes fell downe from on hye He knewe my thought and sawe my gyle I myght not hyde me from his eye To tempte Ihesu it wyll not auayle Of the worldes good he hath no nede I lese on hym so moche trauayle The more I so werke the worse I spede With the sharper assautes I hym assayle The lesse of me he standeth in drede The bolder in byker I byd hym batayle The lesse of me he taketh hede For yf I tempte hym with wrathe or pryde With pacyence and mekenes he scomfyteth me If I tempte hym with lechery I must me hyde He voydeth me of with chastyte In glotony and enuy he wyll not abyde But is euer in mesure and charyte In couetyse and auaryce he wyll not ryde But is euer in largesse and pouerte The deuyll sayd neyther in hote ne cole I may not make hym stumble ne fall I wyst hym neuer go to scole And yet I sawe hym dyspute in the scole hall He set hym selfe on the hyest stole And argued agaynst the maysters all Some called hym wyse / some called hym fole But goddes sone he dooth hymselfe call His werkes passeth mannes kynde For croked and creples he maketh ryght For deef and dombe and borne blynde He gyueth them speche herynge and syght Madde men he gyueth them theyr mynde He maketh mesels hole and lyght Alegyon of fendes in a man he dyde fynde All he droue out through his myght Wyne of water he maketh blyue And dothe many a wonders dede With two fysshes and loues fyue Fyue thousande men I sawe hym fede Twelue lepes of relefe therof dyde thryue To men and chyldren that had nede Deed men he reysed agayne on lyue And yet wered he neuer but one wede He handleth neyther money ne knyfe Neyther in synne desireth he ony woman to kysse But ones he saued a wedded wyfe In spousayle that had done amysse He is so wonderfull in lyfe I can not knowe well what he is I wolde he had ended our stryfe He is out of our bokes / and we out of his Sythen I hym fyrst tempte began I sawe hym neuer chaunge hewe Ones he bad me go foule Sathan Euermore that reprefe I rewe In werkes he is god / in persone a man Lyke to hym I neuer none knewe Where lerned he all the wytte that he can For euery day he doth wonders newe I folowed hym ones to a place To a mountayne vpon hyght Peter Iohan and Iames there was Hely and Moyses stode there vpryght I wolde haue seen Ihesus face But I myght not it shone so bryght The sothfast sonne dyde it enbrace The bryght beames blent my syght To lete the prophecy soone I went The Iewes to sle Ihesus I gaue them choyse If he deye on the rode we shall be shent I wolde not that they had gyuen that voyse I was wo for that Iugement Of crucifige to here the noyse Pylates wyfe I bad besyly gyue tent That Ihesu were not done on the croyse Yet the Iewes for his dedes good False wytnes agaynst hym conspyred And nayled hym vpon the rode And payned hym there tyll that he deyed Vnder his left syde I my selfe stode And after his soule straytly spyed I wyst neuer whyder it yode Whan he gaue it vp so manly he cryed The sonne and moone lost theyr lyght The elementes fought as lyght thonder The erthe quaued and mountaynes on hyght Valeys and stones brest asonder Deed men arose thorowe his myght To bere wytnes of that wonder My mynde fayled I lost my syght I wyst not how soone I came there vnder Ihesus soule is gone I wote not where So pryuely he dyde fro me pas Whan his herte was perced with a spere Than wyst I well who he was Orderne we vs with all our gere For hyder he thynketh to make a race Aryse we all that ben bounden here And styfly defende we our place For yf that he wolde hyder come We shall go euerychone Agaynst hym bothe all and some And tere of hym bone from bone Than sayd Lucyfer anone It is but waste to speke so The spyryte of hym is now hyder come For to werke vs all wo There as the good soules dyde in dwell They cheyned the gates and barred them fast Anone Ihesus sayd / ye prynces fell Open the gates that euer shall last And lete in your kynge of heuen & hell The deuylles asked hym than in hast Who is the kynge of blysse thou doost of tell Wenest thou to make vs all agast Stronge god and kynge of myght I am lorde and kynge of blysse Vsurper of dethe myghty in fyght Euerlastynge gates open without mysse Bothe peas mercy trouth and ryght I brought them at one and made them to kysse Euerlastynge gates open on hyght And lete in your kynge to take out his For I the soule of Ihesu cryst am come hyder Wytnesse therof my body in erthe lyeth deed And the holy goost with the soule togyder That neuer shall parte fro the godheed In heuens blysse ye stode full slyder Through pryde ye offended my faders bede Mannes soule for mekenes shall come hyder There as ye fendes forfeyted that stede Than sayd Lucyfer god dyde forbede To Adam in paradyse but one tre On payne of dethe to haue for that dede And after in hell euer to be And thou arte come of Adams sede Therfore by ryght we chalenge the For in holy wryte thou may rede In hell is no remyde Ihesu sayd Lucyfer trouth thou tellest me But thou wotest not thy selfe how There is a bonde hell / but this is fre The bonde hell was ordeyned for you For that the man forfeyted through a tre Through a tre agayne bought is he now Thou madest hym synne the payne longeth to the For thou waytest neuer good to mannes prow Lucyfer thou me vndernome And sayd that I was of the sede of Adams kyn Forsothe I dyde out of the godhede come And toke flesshe and blode a mayde within For as of the sede of erthe there spryngeth blome So met we and parted without synne Thyn argument is false so is thy dome By what ryght woldest thou me wynne Who was chefe of thy counsayle In heuen whan thou forfeyted the blys In paradyse Adam thou dydest assayle And tempted hym to forfeyte his And I in his quarell toke batayle Ayenst my fader to amende his mys Wherfore of thy purpose thou shall fayle For thy quarell nought it is Than Lucyfer answered agayne Why spekest thou so to me here It was but wanton wordes in vayne I trow thow comest hyder vs to fere Somtyme whan I was in heuen on hye That I there lost for my pryde certayne Here after I hope full sykerly For to come to that blysse agayne Cryst Ihesu spake to Sathan tho And sayd to hym in this manere It is but waste to speke so Or ony suche wordes to vtter here That tyme whyle thou in heuen were Full moche Ioye haddest thou tho For all thy felawes were glad there But ryght soone it was ouergo Lucyfer spake to hym agayne And sayd to hym with wordes sere Here haue I dwelled in wo and payne More than foure thousande yere Helpe me to that blysse agayne The whiche I lost for my pryde there For there in it is pleasure certayne To dwell with aungelles shynynge clere Here me Lucyfer I shall the tell Or euer ony thynge was wrought Heuen or erthe ayre or hell Forsothe than I made the of nought In heuen whan thou stodest wele I made the aboue aungelles all But therof cared thou neuer adele Suche pryde in thyn herte gan fall In heuen whan thou were at thy wyll Thou myghtest haue ben in peas and rest I toke the my sete full styll It to seme thou were full prest And whyle I went where me lyst And come agayne anone on hye Thou sayd thou were worthyest And to syt there as well as I And thou repentest the neuer more But euer aggredest thy trespace Adam wept and syghed sore And asked mercy and oyle of grace My fader sent me hyther therfore And on a tre lete dethe me chace A spere through my herte gan bore And lete out the worthyest oyle that euer was In my faders name of heuen Open the gates agaynst me As lyght of ayre and thonder leuen The gates to brast and gan to fle God toke out Adam and Eue full euen And all his chosen company The prophetes sayd with mylde steuen A songe of wonders now synge we Aha sayd Adam my god I se He that made me with his honde I se sayd Noe where cometh he That saued me bothe on water and londe Quod Abraham I se my god so fre That saued my sone from bytter bonde Tho sayd Moyses the tables he betoke me His lawe to preche and vnderstonde Quod Dauyd we spake of one so stout That sholde breke the brasen gates Quod zachary and his folke take out And leue there styll suche as he hates Quod Symeon he lyghtneth his folke in dym Where as derkenes shedeth theyr states Tho sayd Iohan this lambe I spake of hym That all the worldes synne abates Our lorde them toke by the hande And brought them to the place of blysse And sayd to them I vnderstande This bargayne I haue bought or this For ryche and poore fre and bonde That wyll aske grace and amende theyr mysse Shall be with you here Ioconde In my kyngdome heuens blysse Thus Ihesu cryst harowed hell And ledde his seruaunts to paradyse With the other helles wolde he not mell Where fendes blacke bounden lyse And where dampned soules euer shall dwell That wyll not amende but euer be nyse Tourmented with horryble deuylles fell That somtyme were aungelles of pryce Hell repreued tho the deuyll Sathan And horrybly gan hym dyspyse To me thou arte a shrewde captan A combred wretche in cowardyse Tho sayd Lucyfer sythen the worlde fyrst began I haue brought hyder many a grete pryce Hyder in to hell of all kynde of man Bothe true false folysshe and wyse Hell so worshypped neuer thou were I● thou coudest haue kept the so I brought the bothe god and man in fere Why were thou so nyce to lete hym go Quod hell not with thy powere I myght not warne hym one of tho He toke out all that were hym dere I myght not let hym though he wolde mo Quod Belsabub I barred full fast The gate with locke / chayne / bolte / and pyn And with one worde of his mouthes blast They brake vp and he came in He bounde me and downe me cast It is no bote to stryue with hym Whan the dredefull dome is come and past Our endles payne is than to begyn Though the Iewes made Ihesu to dye Yet on the thyrde day he rose to lyfe agayne It was to hym more vyctory Than though he had all the Iewes slayne Some were glad whan they hym se Some were fory and some were sayne And somtyme in one company Amonge fyue hondred he was fayne Of oyntementes full many a droppe Mary mawdeleyne to Ihesu she brought Ihesu went from her a lytell sloppe And sayd mawdeleyne touche me nought All his dyscyples were in wanhope For to conforte them Ihesu thought And bad them his woundes handle & grope I haue flesshe & blode so spyrytes haue nought Thomas was of ryght harde beleue Tyll he had spoken with Ihesu tho Ihesu spake with wordes breue Come hyder Thomas and speke me to For here thou mayst now the sothe preue How that I was on the rode ydo And he that wyll not on it beleue Shall for euer to paynes go Than sayd Ihesu with mylde speche To his dyscyples I wyll ye go To all creatures about to preche Myn vprysynge to frende and fo And tho that beleue that ye teche Bodyes and soules saued ben tho And they that beleue not I say to eche They shall for euer to payne go Fro you fendes shall fle for my name Addres and venym shall from you stele Though ye drynke poyson it shall you not tame Neyther harme you ne no grefe fele I shall new tongues in you frame All maner of language forth to dele And they that ye touche seke or lame Body and soule I wyll them hele Our lorde after his resurreccyon here In erthe he was forsothe dwellynge Tyll holy thursday comen were That he styed to heuen where he is kynge At the drefull dome without lesynge Bothe quycke and deed there shall he deme God gyue vs grace in our lyuynge To serue our our god and Mary to queme Of all the chyldren that euer were borne Saue onely Cryst hymselfe alone Was none so holy here beforne As was this holy chylde saynt Iohn That baptysed our lorde in flome Iordone With full deuout and good deuocyon And after for Ihesus loue to dethe gan gone And suffred full grete passyon Now shall I tell with full good chere Of that holy assumpcyon Of his blyssed moder dere How she was taken vp with full grete deuocyon Vnto her blyssed sone as her wyll were That therto sent his aungelles adowne And vp they bare that mayden clere Quene of heuen they dyde her crowne Than all th aungelles that were in heuen Were at the crownynge of that mayde fre And songe all with mylde steuen Gloria tibi domine That is a songe of Ioye and blysse God gyue vs grace that lyght to se Of his mercy that we not mysse Oui natus es de virgine This tale that I haue tolde you here Is called the deuylles parlyament Therof is red in tyme of the yere On the fyrst sonday of clene lent Who that wyll for heuen procure Kepe hym fro the deuylles combrement In heuen his soule may than be sure With aungelles to synge in lyght splendent This lesson of new was made but late There be no tryfles in it at all The deuylles boost thus gan he bate Our curteyse Cryst / our kynge ryall He helpe vs all in at heuens gate With sayntes to syt there out of thrall Cryst kepe vs out of harme and hate For thyn holy spyryte so specyall Amen .

Thus endeth the parlyament of deuylles . Enprynted by Wynkyn de worde prynter / vnto the moost excellent pryncesse my lady the kynges moder . The yere of our lorde . M. CCCCC . & .ix.