NAt longe agone it hathe bene sene in afelde in londe of Bergame / & duryngly perceiued .iij. or iiij . tymes in a day out of a certayne wode or forest is come a grete company of men of warre on fote / to the nomber of xij . M. in goodly aray / vnder the obeysans or commandment of v. noble captaynes of the whiche eche of them ware acompanyed with v. M. men of war well apoynted on their right syde / & on their left syde they were accompanyed wyth an innumerable company of men of warre on lyght horses . Betwene these men of warre that be on horsbacke or on fote in goodly aray was a grete nomber of bombardes cour●a●s / slyngis and other great peces of artylery And agaynst this goodly hooste before named apered another more goodlyer stronger / rycher / and in noble araye farre passynge & excedynge the other noble company / accompanyed with semely men and noble captaynes rychely besene as noble of birth / the wyche ij . noble ꝑtyes helde speche with eche other & wythin a lyttel whyle after come out of the wode before named wyth grete triumphe .iij. of .iiij. men on horsbacke / and because that these fornamed personages ware or semed to be apoynted lyke nobell princes therfore they ware taken in sight als royall kinges / the wyche ware accompanyed wyth one persone ryght triumphantly . Rydynge before them excellynge all the other and coude nat of no beholders be ymagened what mans persone this myght be / but the other dyd hym grete honour and reuerence . This same and selfe parsone went witht another ꝑsonage that abode hym on the waye to speke with him the whyche semed to be knouwe for a kynge accompanyed with a grete nomber of many noble princes and lordes rychely besene / but they that semed to be nexte vnto his persone they semed better to be embassadours than other men within a littel whyle after this kynge gaue a meruelous spytfull regarde shewynge that he was very angry and vnpacyent be his countenans / drawyng of his gauntlet of stele & with an yrful countenance casted it vp into the ayre in token of batayle . whan he had so done with great haste he retourned vnto his armye where he had a meruelous goodly company stondynge in a noble aray redy to embatayle with their ennemys than was there herd a great noyse of trompettes / clerons tromles with other instrumentes / & an orryble voyse of artelery in suche maner that it semed to be the noyse of helle the whiche was very feerfull . Also there was sene a grete many of baners & standardes pight in the felde right ryche to beholde on bothe partyes / & than was there foghten a felde or batayle the moste cruelle that myght be thought he mannes mynde the which is nat well to be beleued so maruelously as it was don an halfe houre after that all thynges had ben done & eueryche departed there ware of vs some bolder one than a nother that had beholden this great batayle or foghten felde & went to the fornamed place for to beholde & se whether they coude se or fynde any thynge or token lefte behynd of them that had foghten that meruelous felde & whan they come to the place before named there they se so many & innūerable nomber of swyne that they maruayled sore of that wonderfulle sight these swyne abode there but a lytell whyle in the place where the foghten felde had bene / but they departed into the fornamed wode or forest & ware no more sene Maister augustyne bienuenu & I Bartholomeus decleremont with many more other gentylmen haue bene at the fornamed place & sene all these fornamed thynges whan altogeder was done & endyd there was none other thynge lest but the fote steppes of men & horses with foroughes of waynes & cartes / & the trees sore bront and torne asonder with the fyre of their ordenance or artilery that had ben shote thourough . I shewe you playnly lorde vnfray that he alone ought nat to be afrayde that hathe sene this / but also they that here of it / I ensuere you that this is as trewe as god is in heuen that created man of erthe in euery worde as I do wryte . and I certefye you that som of them that haue sene this be fallen into a grete sekenes & in peryl of dethe for grete fear / And I wolde wryte other thynges to you but this is so maruelous & ferfull that I to you no thynge ellis do vryte at this tyme / but that I me to you recommend in my hertyest maner .. & c̄ ..