Here beginneth a lytel treatyse the whiche speketh of the xv. tokens the whiche shullen bee shewed afore ye drefull daye of judgement And who that our lorde shalt after chenyng of euery body of his wordis, workis and thoughtes. And who oure lorde wyll shewe us other in tokens. of his pasion, to theym that been deyeth in dedely synne.

HEre beginneth a lytel treatyse the whiche speketh of the xv . tokens the whiche shullen bee shewed afore that drefull daye of Iugement . And who that oure lorde shalt aske rekenyng of euery body of his wordis workis and thoughtes . And who oure lorde wyll shewe vs other xv . tokens . of his passion to theym that been deyeth in dedely synne .

depiction of two male figures and one female figure standing apart from each other, and two other male figures emerging from the ground

depiction of a male figure or monk seated in a scriptorium

IN this begynnyng so wyl I writte of the xv . Tokens they whiche shullen be shewed afore the drefull daye off dome of our lorde Ihu xpen . and there shal we shewe oure self Ionge and olde &c.

¶ And our lorde wyll that there shal be shewed , iiij . tokens after doctours sayng . For oure lorde is so mercyful that hy wyl not punisshe vs but he wyl shewe somme tokes afore . And that we maye besory off our synnes and do penaunce . And after thise forsaide iiij . tokens shullen yet bee xv . other tokens bee shewed . Whiche Iheronimus had fonden in the rinskens there Cronicle ther Iewes . Of whiche xv . tokens forsayde shullen be declared be ordinaunce here after . And that firste token of the iiij . shal be that the myght of Sathan thorugh the passie of our lorde was made lasser . and was bounden . & shal be onbondē . All be it that he by the myght of the passie be bonden . & may not do so moche harme to the menshen as hy was wonte to do . But the deuyl is bonden at certen tymes . & hi shal be onbondē that hi maye do the more harme to the people wyth temptacien and tribulacien for to assaye theym tho that bee chosen .

But in the last tyme of the worlde shullen the goode bee very goode and the euyll shullen bee very badde . Lyke the holy writters shewen in the laste chaptre of apocaliosis . ¶ Tempus prope est qui nocet noceat ad huc et qui in sordibus est sordescat ad huc . et iustus iustificetur . ad huc et qui sauctus est sanctificetur . ad huc .

THat seconde token of the foure . shal be as loue shal be loste and not more be vsed . Lykewyse as the menshen warend olde and the nature waxed colde in hem . whiche the philosophe called it the lytil worlde . Lykewyse is it of the grete worlde . Who she more cometh to the eynde who more the loue waxed colde in herself . But the hotte of a body is gostly of lyuing there gretter world . And shal alle hole fayle for it goth sore to the eynde of the worlde . As apostolus ad hebreos . Qui antiq̄tur & se nescit prope īteritū est . And a man maye nowe knowe who that god is serued without deuocie . And how he is blasphemyed . and by hem swering & also pulle hym all a sonder in pices . And ye maye wel knowe that the loue is al moste al done & is waxen colde and dreyed awaye . but some bee naked and praye hertely but they fynde noo helpe . & they that be hongery deye for honger & haue none socour . The gate of mercy is shitte the fonteyne of the compassie hath shitte her condutes . And through fayled amonge his frendes . and she shal not bee fonden afore god shal gyue sentence vpon theym that haue honred charite and pacience out of this worlde .

That thyrde token shal be as all maner of euil and synnes shal be in this worlde & the fere of god be put done / and haue none thinkyng on hym . And whan faythfull and pacience shal not besette be but almaner of eueyll shal be vsed and whan the mēschen shullen louen with a secretely loue & care of none man but for her owne ꝓfyt And also we shal be afore the eynde of the worlde be prowde & hy shal make moche of hem self & shall blasphemeren the name of our lorde and they shullen not care of there fader or moder and than they shullen loue flesly natur more than god As the apostel in the .ij. episle ad thy moteum

Therfor latte euery body remember in hem self what people nowe a daye be lyuinge in this worlde and loke wel yf this aforesayde thinges not be nowe a dayes shewed & done and set be none synne . For it is not well possible that ony body myght writte the grete synens the noweadayes be done praye to god that hy wyll torne hys people that the maye do penaunce afore there deth

That for the token that shall before the eynde of the worlde & fore the other . xv . tokens & afore that grete ordil a fore the daye of dome and than shal ther be grete peruerten and warre & there shal be warre in many dyuers landes of the worlde and also amonge al creatours in this world lyuing For as matheis sayde in . xiiij . chapitre Fyghtyng and warres shal be amonge vs and also one body shal aryse ayenst tho ther and also one kynge ayenst on other and also troyson shal be a moge townes all haue they made pays & pays shal be oute the world & layed done and also the prīshe ayenst his comen & his comen ayenst hem . And also ther shal be none closter of monkes nor of nonnes it shal be full of peruertes or contrary one that other And than shal it be as / Iheremias writted in his x. chaptre Vnusquisque se a suo ꝓximo custodiat That is to saye Euery man kepe hem of his neygbour or frinde & troste not his broder for one shal shewe an other a fayre face but it herte of hym is fulle fals & also one broder shal mocke that other and he shal laye snares & gynes for hem to begyle yf he maye And than is it fulfylt like . Messias the prophete sayde Kepe you of beware you of your owne wyff the whiche sleped in your armes for she shall begyle her owne husbounde and also the childe shall begyle the fader & the fader the childe and the doughter the moder & the moder the dought̄ and also one broder shal deliuer that other to deth & the fader the sone & the children the fader . And whan al thise thinges & ꝑuertē shal be though out of all the worlde than shal it be an token of the laste termyn or eynde of this worlde . Other peruerten shullen be in the firmament But commūly it shal be a dyre tyme not allone in one prouince or kyngdom but thorugh out of al the world . but it shal be that the erth shal bere none fruyce to oure behouff or nede to lyue with all . And it shal be also grete erth beuīge be ayenst nature that ther shullen fallen done castels & houses And also in the zee & Ryuers shullen be more peruerten than it hathe be afore And the ayer shal be full of corrupcyen and venym therof shullen comen grete pestilenciē as well in the bestes as in the menshen therof they shullen deye . & also dōneryng lightning tempestes and wyndes shullen be more perylos than the wonte the Bee . & the people shal be sore aferde And lykewys as sanit hyeronimus hath founden xv . principael tokens they shullen be afore the dry ful daye of dome of our lord . Ihu xpi .

But wee knowe not yff these . xv . tokens shullen be shewed one after on other . or yf ther ony other token shal be shewed betwene Therof sayde saint hyroniꝭ none certen nor none doctour but they putte it in the wyl of oure lord but our lord maye ther wyth do hys wyll but hy is almyghty

¶ Here folowen the .xv. principael tokens the whiche shulen be shewed a fore the grete ordeel of Iugement of oure lorde Ihu

¶ Of that fyrste token

depiction of a pond of lake full of fish

That fyrste token the wiche shal goo afore the comen Iugement shal be . that the see shal aryse . xi . cubitꝭ aboue all hylles there worlde . & shal so stande in a token of a miracle without rennyng ouer or goyng done and noo more in one place than in another & shal stand stylle in hier one place for that thei wordes of psalmi . sholde be true . like he sayde Mirabilis elatioēs maris : Merueylous is the see of her oprysynge . and this shal god suffer . for the punisshe the whiche haue be prowde like the wyse man sayde in his ꝓuerbe . xiij . chaptre . Cor superbiq̄ū mare feruens ꝙquescit . The herte of pride is like the bernende zee the whiche none reste en hath & not others desired than discord and warre . The whiche is comen of pride like Salomon sayde in his ꝓuerb . Int̄ suꝑbos sꝑ iurgia sunt Discorde & twyst is euer amonge the prowde folke . & the prowde will also be in the heyest plase . and of a lityl thinge that whiche he hath done wyl he be worshipped & honoured . & neuer is he fulle of worship & euer . wolde haue more . And god shal this done for to punysshe the proude the whithe them self so enhaūcen & wyl be beter than on other . & he shal take of theym there landes & goede . And also that they sholde knowe there synnes . & torne them to penaunce . For our lord is so full of mercy that he wil that none soule sholde be loste . but he gyueth vs knowelge & token of trybulation and other pouerte that we sholde knowe hem and do penaunce . like the apostel sayde . Non dimittitur ꝑctm̄ nisi restituatur ablatum : that is to saye . The synnes en been not relest nor forgyuen . but hy doo satisfaction therfore

¶ Of that seconde token :

depiction of the sea fallen below the level of the land

THat seconde token that whiche shal goo afore that comen Iugement shal bee . that the see shall good one in to the erth . lyke yf the sonne it had dreyeth awaye . Lyke as the prophete Naum sayde in his fyrst chaptre . ¶ Increpans mare et exsiccans illud . ¶ That is to saye . that the maker of alle the worlde shal the see done gone in to the dypte of the erth . lyke yf she had bee dreyed oute . in a grete token of impossibilite or of in meruelyosite . And betokeut that the proude and lecherous folke ful of flesly luste and haue foloweth the resynne . And haue laboured for to gete greate richesses and bildinges as houses and other castels And haue not byldeth in heuen by our lord Ihesu and haue not byldeth gostely for ther soule helthe And lyke as the haue putte done they pouer and haue not succured them wyth there good as god hath sente you in this worlde . But in the daye as the see shal hem hyde in to the erthe . Lyke as it is sayde afore . and that shal be done for suche folke as it is spoken of afore . & they shullen be ashamed of there synnes and shullen be dampned for suche synnes . Lyke saint lucas shewed in his xiiij . chaptre . ¶ Quise exalt at humiliabit̄ . And in his prouerbe xxix . Superbum sequitur humilitas .

¶ Of that thirde token .

depiction of a merman and mermaid in the sea

THat thirde token shal be . that al beestis and fisshes shullen monstren . and in the see thei shullen come to gyder & make a grete complaynt and cryeng merueylously that it shal be herde in heuen and god shal this vnderstonde allone Of this sayde Iob in his xij . chaptre . ¶ Loquere terre et annunciabit tibi Et enarrabunt pisces marꝭ . That is to saye . Speke to the erth and she shal saye you all the ylle of the men shen . And the fysshes of the see shullen speke to you of the euyll of the folke .

¶ God shal suffer this to one token to the people tho that haue lyued in that water of Ioye . and lustenes of the fleshe . And they that hauen be mery in daunsyng pyping and in synging more than to the commaundementis of oure blyssed lorde Ihesu xpen And their myrthe shal be chaunged in grete heuynesse . Lyke vs lucas declared in his vi . chaptre . Ve vobis qui nunc ridetꝭ quia lugetis : That is to saye . Sorowe shullen they haue they that lawhen . For ye shullen wepe in bitter teeres in that daye of Iugement . And they that hauen done penaunce in this worlde they moen wel be mery . As our lorde sayde / Beati qui nunc fletis 〈◊〉 ridebitꝭ / That is as moche to saye / ¶ Blyssed be all tho that wepe in this worlde & sufferen / For they shullen be mery in euerlastinge glorie / And the fisshes and beestes of the see shullen speke of one maner or cryeng . and complayn ouer the menshen for thir grete synnes . for whiche synnes they sufferen grete peayn in the see .

¶ Of that forthe token

depiction of the sea on fire

That forthe token shal be that the see and all other waters and ryuers shullen bernen of the fyre that whiche shall Come oute of heuen . and shal punysshe theym that haue lyued lecherously in this worlde . after there lustisnes of the fleshe . And haue lyued ayenst the commaundement of our lorde Ihu . And suche folke shal berne in the fyre made of brymstone . Lyke ye fynde in Apocalipsi in his xxi . chaptre . ¶ Erit pars eorum in igne et sulphure . And also for there plesure the whiche they haue hadden in there lecherousnes . shullen haue a sonder peyne in euerlastyng fyre Lyke ye fynde in apocalipsi in his xviij . chaptre .

Quantum in delicijs fuit tantum date tormentum et luctum . Gyue theym payne after that they haue deserued . the whiche haue lyued lecherously and hauen kepte other mennes wyues . & hauen lyued after there owne plesure and flesely luste . Therfore shall this token bee shewed that the see and alle Ryuers shullen bernen as ye here maye see portred &c.

¶ Of that fyfte token .

depiction of seven forest birds, including an owl and a peacock, surrounded by falling blood droplets

THat fyfte token shal be . that alle herbes trees forestis and boskasyen shullen swete droppes lyke blode . As Sybilla writted . And Iohel in his secunde chaptre . Spekende in the person of god . ¶ In diebus illis dabo prodigia in celoet in terra sanguinem et vaporem fumi . That is to saye ¶ In those dayes shal I gyue tokens in heuen and in erth of smelling or sauoring . Also in that same daye shullen come to gyder all byrthes . they shullen cryen and wypen . And they shullen not bee wyllyng to ete nor to drinke in noo maner wyse . ¶ Thyse forsayde sauour and bloet that the trees and herbes shullen swete . that shall god suffer for to punysshe the manquellers and mordenars in a peayne tho that haue kylled theym that neuer was gylty . Lyke as Seneū sayde in his iiij chapitre . Spekyng in the person of god to Cayin . that blode of thy broder Abel cryed to me of the erth into heuen . ¶ And that wepyng and cryeng of thise byrdes shullen not wylling bee to ete nor to drynke . And shal be done in a peayne and in a token of they dronkarts . tho that be euermore dronken in this worlde . and so lyue in moche etyng and drynkyng . but they shullen be punisshed in helle of the honger ther deed . Lyke salistinus sayde . ¶ Mors depassed eos . And so they shullen be punysshed with dyuers tormentes .

¶ Of that vi . token

depiction of buildings falling down, including a church steeple and tower tops

THat vi token shalke . that alle townes . Castels tours . houses and other byldynges shullen falle downe . Lyke saint Lucas & Matheis sayden in xxiiij . chaptre . ¶ Non relinquet̄ lapis super lapidem qui non destruatur . That is to saye . ¶ There shal not one stone abeyde by that other . And that shal god suffer for they in that haue laboured for to make grete castels and fayr houses for theyr pleasur Than to make one fondacien or to bylde in the worship of oure lorde . for to fynde a house in heuen Lyke saint Iohan sayde in his xxiiij . chaptre . ¶ In domo patris mei mansiones multe sunt ¶ That sayde oure lorde In my faders house bee many wonyng places . For they soules shullen haue that the deserued for one shal haue more than the oder Therfor ther bee many wonyng places thereof sayde Ysayas . ¶ Ve qui coniungitis domum ad domum et agrum agro copulatis . O wee ye ryche ye make houses by houses wyth begylynge & make grete your lande and fyldes . and one acker by that other the whiche ye haue taken of the power folke knowelyng by force or stronge hande : And they that haue noo myght ayenst you . O ye riche loke on your worldely houses the whiche ye haue byldeth wyth grete labour . And wylt not ones saye to your owne self . O good lorde hadde I made one house in heuen for my soule helt wyth so greate labour as I haue done in erthe I hadde done wysely for my soule &c.

Of that vij . token .

depiction of stones

That vij . toke shal be that one stone shal bete that other and shullen fyghte in them self & they shullen springe asonder . and so fighting thei shullen gyue and maken a grete noyse of cryeng And that shal noo man vnderstande but god allone . Lyke it was done as our lorde was Crucified . As matheus sayd in his xxvij . chaptre . Petre scisse sunt . And that shal be done for to fere them tho that ben harder than stones . for they haue noo feere of our lorde . & they maye not be made tendre for no preching of the peyne of helle . nor of his Iugement nor of his passion . but they stones hauen hadd compassion of our lorde in his passion in maner of speking But they synner is so harde that they wyl not shryue them nor do noo penaunce for their synnes But late vs praye to our lord Ihu that he wyll make our hertes tendre that we maye besory for our synnes .

¶ Of that viij token .

depiction of a female figure falling over, with cattle and a sheep nearby

THat viij token shal be . that ther shal be a general erth shakyng and contrary ther erth And shal be shewed ouer all the worlde . so perilous that nor man nor wyf nor beeste shal mowe stande vpright . but shullen fallen done the gronde . Like it speketh in apocaliꝓsi xvi . chatre . Et fcūs ēterremotꝭ magnus q̄lis non fuit ex quo homines een ceperunt . That is to saye . Afore our lord shal come to Iugement shal be also greate an erthquauyng as euer hath ben . sith our lorde the worlde made . & this shal be done for to fere them tho that ben yet in erthe And shal be a token that the erth shal bere noo more the synners . but shal them leue . & our lord shal do ouer them Iusticie , & shal theym gyue they maledictie in the pytts of helle wyth Lucifer . And the people & synners shullen seke places & holes for them to hyde ther in . And there shal be shewed the greate vnmerciful that our lorde hath to the synners For the that wolde not leue there synnes for all they tokens that they myght see here afore .

¶ Of that ix token .

depiction of a plain studded with the tops of mountains

THat ix token shal be that all hilles and valeyes shullen be plaen . & this shal be as Ysay as in his xl chaptre shewed ¶ Omnis vallis īplebit̄ . et omnis mons et collis huīliabit̄ . that is to saye That all hylles shullen be leyde done . & that shal god shewe for to feere al princes tho that make moche of themself & haue put done they pouer . for all kynges lordes & princes been all like the pouer . For they be alle made of one substans & haue all had one fader . and god shal suche kinges & lordes gyue wages like they haue deserued . Like matheis sayd in his xvi . chaptre Filiꝭ hoīo reddam vnicuique scdʒ opera sua . Wythout ony taken out as wel the mayster as the seruaunt . Like psal. sayde . Cum accepero tempus ego iusticias iudicabo . that is to saye . As I shal take the daye & the houre shal I Iuge the goode & the badde workes of the people . as wel the one as the other . of what state or cōdycien that thy be

¶ Of that x. token

depiction of two male figures and one female figure standing apart from each other, and two other male figures emerging from the ground

That . x. token shal be . that al men & wymmen they that had hydde them in the erth shullen come ayen out of ther holes like as madde folke . And shullen so sore bee aferde / that one shal not mowe speke to that other And this shall god shewe in one token that whan god shall gyue Iugement ouer the good and badde . Shal hy no man excuse . whiche Iugement them is shewed wyth many tokens yf they wolde nott torne theym fro their synnes and doo penaunce : And god shal also shewe this token to the people that shal lyue than in erth . That Maria the moder of our lorde Ihu aduocatrice to all synners that in the houre / of Iugement shal she not conne helpe no mannor none saint of heuen but ther owne good dedes .

¶ Of that xi . token .

depiction of an open tomb with skulls, bones, and two skeletons or corpses

THat xi token shal be . that all graues & thombes shullen stande open . fro the vprysing of the sonne and goyng done ayen . And also alle bones of the bodyes the whiche that bee deth fro the begynning of the world to that same daye to . shullen aryse by and by . ¶ Lyke Ezechiel sayde in his xxxvij . chaptre . Erce ego aperiam tumulos vestros This same token shal god shewe to one token to alle tho that hath bee hydde secretely Lyke synnes that haue nott bee confessyd nor shryuen therof . And they that haue done sinnes secretly and haue not shriuen them therof nor hauen done no penaunce . and all they shullen be dampned . Lyke euangelista sayde . Nihil oꝑtum ꝙ non reueletur nec absconditum quod sciatur . That is to saye . None things so secretely kepte but oure lorde shall haue therof knowlege in the daye of Iugement . and no thing so vnbeknowen but it shal be knowen in commun of euery man in tho dayes . &c.

¶ Of that xij . token .

depiction of creatures staring up at the night sky, including a boar, ox, dog, cat, rabbit, horse, lion, and unicorn

THat xij token shal be that sterres shullen fallen out of heuen . for al planetes the whiche that goo aboute wyth the cours of the elementis . and also they that stande stylle be called in latyn planete or stelle errancie . Shullen fallen and casten oute grete cometes with longe tayles . lyke a burning spere . that whiche shal bee sore fertfull on to see . And shullen all beestes come to gyder and making a grete noyse wythout mete or drynke . Lyke matheus writted of the sterres in his xiiij chaptre .

¶ Stelle cadent de celo et virtutes celorum mouebuntur . Of this maye ye vnderstande that the peple shal see no more lyke yf they had be caste out of heuen , Lyke ye maye vnderstande of saint ambrosius Iheronimus and beda . As the sonne and mone and alle othe bryghtenes of heuen shullen chaunge ther brightnes into derkenes nott that they shullen lese there bryghtnes . To vnderstand as our lord shal come to Iustice than shal be suche a brightnes that the sonne and mone shullen lese their brightnes . Here of sayde the prophete Iohel in his iij. chaptre . ¶ Sol conuertetur in tenebras et luna insanguinem antequam veniat dies dni magnus et horribilis . That is to saye . Afore oure lorde Ihu shal come tho Iugement shal the sonne lese her bryghtnes . and the mone shal tourne her in to blode . Lyke in apocalipst is shewed . ¶ Sol factus est niger quasi factus cilicinus et luna fctā est quasi sanguinis et stelle cadent super terram . That is to saye . In tho dayes shal be a meruelyos token . as that the sonne shal be like a sacke caste with esshes . and the mone shal be redde like the blodde And this is to vnderstande that alle creatures off heuen syeng the eynde of the worlde . Wherfor that they ware made to gyue bryghtenes in token off soroufulnes . Lyke whan the mayster is deth than the seruaunt putt on hem blacke clothes in token of mornyng . And not that the sterres shullen fallen done to the erth . but they shullen abeyde aboue in the ayer and makyng a grete noyse of lyghtning and they shullen not be wasted . but shullen abeyde in that loweste parte of the ayer and the peple shal wene that they fallen to the erth . And verely as men sayd the myght of heuen ys lyke angels goostes and the workes of heuen shullen peruerten & tremblem in the daye of Iugement . Not that thei haue feere of dampnacion . but the tremble for the reuerencie that they shullen done . but whan thei shullen seen they grete myght of our lorde comyng to Iugement wyth alle his Empire and myght & lokyng so ferthfully ayenst they that be dampned and than the angels shullen humbli bowe them Lyke yf they sholden suffer the euerlasting payne And ye maye also vnderstande of the peruerten of the angels and goostes that she hem peruerten for to fulfylle the wyl of oure lorde : And this shall god suffer that the sterres shullen fallen . for to feere theym tho that bee fallen fro their belyue . and for theym that haue not meyntened oure belyue and tho that haue kepte it a backe &c.

¶ Of that xiij . token :

depiction of a pile of recently dead bodies

THat xiij . token shal be . that all men wymmen and children they than bee alyue op the worlde shullen deye wythout ony remedy . And hy shall this done for that they shullen aryse ayenst the day of dome wyth them that haue ben dede in the begynning of the worlde to that daye to aforesayde ¶ And certeynly this shal bee a pytuosly worke that all people tho that ben alyue . goyng sytting standing liggyng etyng or drynking . shullen be hurt so shortly wyth the lancie of deth sudenly . ¶ O ye wretched people ye wene to lyue euer , but thinke that ye shal deye . & you knowe nor daye nor houre And also you thinke not on your synnes . ¶ O ye men and wymmen what shal ye do whan ye haue none tyme for to amende your synnes .

¶ Of that xiiij . token .

THat xiiij token shal be . that heuen and erth and alle elementen shullen bernen and specially alle thinges that whiche is operthe . And the bodyes of men and wymmen shullen be burneth in to esshes . Lyke Genesi sayde in his iij. chaptre . ¶ Puluis es . et in puluerem reuerteris . And of the same resolucien of heuen and the et the sayde Matheis in his xiiij chaptre . Celuin et terra transibunt And of this same fyre sayde Psalmista . ¶ Ignis ante ipsum precedet . That fyre shal goo afore that comun Iugement Whiche fyre shal be very grete by the myght of oure lorde . Not allone that fyre in hem self but all fyres in erth and shullen come aboue to gyder for to for burne alle the worlde . And the doctours saye that this fyre shal haue thre maner of myght . As the myght of the fyre of erth . for too take and to burne all to thinges that ye maye fyle Lyke trees herbes and in general all tho thinges that ben in erth . For that same fyre shal tourne in to esshes . As all bodyes of men and wymmen . And it shal haue the myght of the fyre of the elementis and shal purgyren the ayer and elementes . And this same fyre shal goo aboute alle the worlde and make clene all the elementes of the Infectie of the people . And this same fyre shal goo also hyghe as the Infectie is gone of the synful people . for to purge all that same . Lyke our lorde sayde that heuen and erth shal be burned and fergo . not that the be wastable na the substancie . for the be Incorruptible or wastable . and that same fyre shal goo aboue all hylles xv . cubytes . lyke the dyluuye dydde for too purge that opperste parte of the ayer . the whiche that the synful people hadde be smytted wyth there grete synnes . And in this maner shal the heuen bee purget . But the thinges of heuen shullen not bee wasted in noo maner of wyse . Lyke propheta sayde . ¶ Ipin ꝑibunt tu aunt permanes . That is to saye . That the heuen shal fergo after somme disposicie and chaunge lyke it now is . And the shal not bee wasted to saye after ther corruptibilier substācien . And than it shal not bee nedeful &c.

¶ Of that xv . token and of that laste .

depiction of naked male and female figures emerging from the ground and the sea

THat xv . token shal be that heuen and erthe shal be chaunged and made newe . Lyke it is sayde afore . And all people shullen aryse too the Iugement . Lyke saint Thomas sayde . That the elements shullen be made newe And the erth shal be bryght . and that water like the cristal . and the ayer lyke heuen . and that fyre lyke the bryghtnes of heuen . and I shal see noo thynge in the ayer aboue . but shal stande stylle and remeue not . And certeynly this forsaide fyre shal burne all bodyes of the people yf they bee dede or alyue good or bad but there shal be difference it shal gyue peyne to the badde . and none to the goode . But it fyndeth noothinge there to purge . No more than it dydde to the thre children the whiche waren put in a forncyse . As daniel sayde in his iij. chaptre . ¶ And certeynly all this is not others than as god it wyl haue . & no man knoweth it but god alone of this tookens afore sayde . and yf they shullen bee shewed one after an other . And yf there more than one shal bee vp one daye . but this same is vncerten & vnknowen . And therfore it is possyble that that fyre ther purgacien shal come op that same houre as the peple shullen bee slaen . and than they shullen be burned to esshes to pouder and dust .

¶ And therfore shal men not saye for certeyn that they forsayde tokens shullen bee vpon . xv . dayes one after an other . ¶ Lyke Iheronimus hath fonden in the Hebrewshe Cronicle . For by hemselfe is there of vncertaeyn .

But the moste parte of thise forsayde tokens maye ye wel belyue for the be geapprobiert with the holy gospels . that the worlde shal burne and purge the elementis . And also that the hooly bodyes shullen aryse . And that same fyre shal goo aboute after the Iugement and shal take all corrupcien wyth hem and shal goo wyth a grete hette to helle . and ther wyth to punysshe the badde . And alle those that of suttylnes is in this same fyre and off good workes shal abeyde aboue in euerlasting glorie . And this is knowen that this same fyre shall goo afore that dreful daye of Iugement .

¶ Here endeth the xv tokens

depiction of two male figures throwing a third figure into a pit or well, while a male figure with crown and sceptre points

¶ And here foloweth who our lord shal 〈◊〉 shal come to Iugement :

ALle cristen peple be of very doute to knowe by the simbol of the belyue . That is oure Credo . lyke the symple peple saye . whiche euery body ought to knowe . or to haue penaunce the euerlastinge dampnacion of his soule . ¶ And oure lorde shal come at that same daye to Iuge the that be alyue and tho that be dede . and good and badde . In whiche Iugement he shal gyue euery body after that they haue serued . And this shal be done lyke it is sayde afore . But as oure lorde shal come with grete myght in tyme of Iusticie in whiche tyme shal be noon mercy . After that vision of saint Iohan in appocalipsi in his x. chaptre sayde . One angel comyng oute of heuen . puttyng hys right fote op the see and his lyfter fote vpon the erth . & makyng his othe by our lorde the whiche is alyue in heuen . That that same tyme sholde be no more Glosa . the tyme of mercy . But the tyme of Iugement and ther Iusticien . And sayde that ther spake to hem vij . donre claps . and there by shullen we vnderstande that ther shullen fallen vij . peryllosshe thinges . The whiche shullen fallen vpon they tho that bee dampned . ¶ And tho that bee sauyd shullen haue vij myrthee . in that same daye of Iugement . & by that first donre clape shal ye vnderstande the arysing of the ded bodyes men and wymmen But after the purgacie of the fyre in erth . shal out lord be redy to come to Iugement . and his angels shullen blowe the trompettis making a grete noise . and they shullen brynge to gyder all frindes of oure lorde . the whiche that haue be tourned in to esshes in all foure corners of the worlde . Lyke matheus sayde in his xxiiij . chaptre . ¶ Mittit angelos suos cum tuba . And this same blowyng shall be herde of good and badde and shullen aryse vpon that same daye . As the apostle sayde ad Corintheos . ¶ Omnes quidem resurgemus . And they trompettis shullen gyue a meruelyous noyse . Wherof saint Iheronimus sayde ¶ Siue dormio siue vigilo &c. That is to saye . Slepe I wake I ete I drinke I. or what that I do . euer my semeth that I here the laste trompettis of that drefull Iugement Sayng stand op ne deed and cometh to Iugement . Lyke one doctour sayde op that booke of sapiens . The noyse of thyse trompettis shullen gyue a fylynge sowne the whiche shal commaunde that commaundement of our lorde ihu xpi . by whiche commaundement all deed bodyes shullen aryse . As Chrisostomus sayd . That is one meruelyous sowne of the crompettis that it makith the elementis subgette and also parted the stones . And doth open the yate of helle . and brecte the yate of Aren and the gate of helle made of yron . and brecte the bandes of the ded people . And shal gyue euery body his soule ayen and shullen be pulled out of the depnes . And eueribody shal than haue his soule open . And that same sowne shal not bee herde allone in heuen butt also in erthe . And adam shal come fyrst wyth alle his progenie the whiche that haue serued our lord Abraham shal come wyth alle holy patriarchen Isay as wyth all holy prophetes . Dauid wyth all good kynges Saint peter wyth all apostles euangelistes and disciples . Saint stephen and Saint Laurens wyth all tho that haue shedde there blode for the loue of crist . Saint nicolaus and Martimis wyth alle his confessours Saint katherin with all holy virgins Saint elisabeth wyth alle holy & sage wymmen weduwes Saint Anna wyth all wymmen that haue not broken there wedlocke : And the quene of heuen shal come wyth alle relygious persones the whiche that hauen serued and worshipped her . And lyke wyse shal the noyse bee herde in helle . As Crisostimus sayde . ¶ And than shullen comen Lucifer . Asmodeꝭ . Sathanas . belsebuck . astaroch . and other capiteyns . and wyth all that in helle is . And this forsayd blowyng shal bee herde in all corners of the worlde . ¶ And than shall come Cayin the whiche slewe his brother . & shal goo wyth the forsayd deuyls . and also al mordenars . Iudas wyth all traytours Pylatus with al vntrewe iewes . Herodes wyth all fals kynges & princes . Barrabas wyth alle theues . Lamech with alle tho that haue not kepte there wedlock . Nemroch wyth all vserers Yezy wyth all fals marchans . Symon maguo wyth alle nygromantiers . Athalya wyth all tho that haue kylled there children Isabel wyth all harlottls and lecherous wymmen . Like saint Iohan sayde in his v. chaptre . Procedent qui bona fecerunt in resurrectiōem vite qui vero male egerint in resurrectōem iudicij And ye shal vnderstande by the secunde donre clap Wherof that the euangeliste sayde . in apocalipst . That all tho that shal be to gyder in the Iugement shullen bee departed in foure . The first company shullen sytte by the Iugement of oure lorde . As oure blyssed lady the moder of our lorde Ihu . The apppostles . discipules . marters . Confessours . patriarches . and prophetes .

¶ And this same compasy shal stande there besyde not for to gyue sentence . But for to approbere the sentence of oure lorde Ihesu Criste . ¶ And in this forsayde Company . Alle tho that haue lefte there goode here in erth for the loue of oure Lorde And hauen gyuen it to the pouer folke and to the Religious people . And to tho that haue kepte the commaundement of oure lorde . Lyke matheus sayde in his xix . chaptre .

¶ Vos qui reliquistis omnia et cetera .

¶ And also in the secunde company shullen bee in that same Iugement . all tho that haue ben good people . And haue also done synne and haue done penaunce therfore gladly for there synne . and haue also done the workes of mercy . And oure lorde shal saye to theym . Come ye that haue done my wyl and commaundement in euerlasting Ioye & shal saye . ¶ Esurrui & dedisti mibi manducare &c. ¶ I haue hadde honger and you haue gyuen me mete I haue be dorsty . I haue been a pylgrym . I haue ben naked . and you haue hulpen me in alle my nede and haue ben merciful . To them shal saye our lorde . Comet ye in that richdome of my fader whiche I haue made redy for you in the beginnyng of the worlde ¶ The thirde company they that shullen come to Iugement shullen bee the badde cristen people . tho that haue not kepte nor fulfylled the commaundementis of our lorde . nor the workes of mercy . And our lord shal saye to theym . As matheis sayde in his xxv chaptre . ¶ Esuriui ec non dedistis mihi manducare &c. I haue hadde hongre and ye hauen gyuen me noon mete nor drynke . & I haue desyred the goodnes of your soule . and ye haue cared not thinge for me . And ye haue not loget me nor herborwed . nor haue me take oute off pryson . nor ye haue me not clothed . And tho that ben dampned shullen saye wee haue you not seene naked . Lyke yf they wolden saye we haue you not seene in erth . And our lorde shal saye ayen .

¶ Quod vni ex minimis fecistis &c. That ye haue giuen the leiste or the lowest of pouer people in this worlde that haue ye gyuen me . and that ye haue gyuen not / that haue ye denyed me . And therfor our lord shal saye / Gaet ye that bee dampned in that euerlastinge fyre of helle that neuer shal haue eynde ¶ Whe fourth company shullen be Iewes turkes and heyden folke . the that belyue of our lorde not hauen kepte . And thyse , company shullen bee gyuen to the deuyls of helle wythout of ony mercy . Wythout ony Iugement to doo ouer them . For al suche folcke is dampned afore they parte oute off this worlde . Lyke saint Iohan sayde in his iij. chaptre . Qui non credit iam iudicatus est . And as matheus sayde in his xiij chaptre . The angels shullen gader then goode oute of they badde , and shullen they sende in that burnynge furneys and fyre off helle . There euer shal be wepyng and mornynge wythout eynde euermore and euerlastynge &c.

¶ And ye maye well vnderstande that the badde shullen be Iuged afore the good in the daye of Iugement of the rightwys Iuge oure lorde Ihu xpi And shal receyue mercyfully the good and shal saye to theym . Comet ye blyssed myns faders and receyued that whiche is made redy for you in eúlastynge Ioye of heuen . And as the wyse man sayde . soo shullen the badde not see the myrthe of our lorde . ¶ Tolletur ipsius ne vide at gloriam dei . That is to saye . Take aweye the badde that they not see the glorie of oure lorde Ihesu .

¶ And here foloweth . who that oure lorde shall shewe the blyssed tokens of his passyon to theym tho that be dampned to grete payne / and to them that bee saued to grete myrthe and glorie .

depiction of a male figure or Jesus Christ above two groups of naked figures, one surrounded by clouds, the other by flames; in the background tokens of the Passion: crown of thorns, vinegar sponge, ladder, spitting head, and a column with ropes and whip

ANd by the thirde donre clap . Lyke saynt Iohan in Apocalipsi writted . shullen we vnderstande they blyssed tokens there passyon of oure lorde Ihu . the whiche he shal bringe with hem to Iugement . for hy shal shewe theym to all rede ly creaturs . the that be shapen of the begynning of that worlde , to that daye to of Iugement . & the tokens of his passyon shullen bee brighter than the raynes of the sonne or sterres . And our lorde shal saye to theym tho that bee dampned .

Loke here that tresoure of my blode that whiche I haue giuen for you . Where is that seruice or gifte the whiche ye hauen gyuen me . for that costely tresour of my blode . And than shullen alle nacion of the erthe complaen ouer them self . And principaly the turkes . Iewes and heyden folke . They shullen them self gyue discomfort . for that they haue ben ayenst oure lorde . And the fals kristen people shullen complaeyn that they haue done so moche ylle . for they good workes the oure lorde Ihesu hath done for vs &c.

¶ Who that oure lorde shal speke to the synners & mysdoers of his passien .

depiction of a male figure or Jesus Christ nailed to a cross; below a birch and whip, two hands and two feet with nail wounds, a spear or lance entering a heart, a crown of thorns, and three nails

ANd also in that daye of Iugement shall oure lorde saye to them tho that be dampned . Loke here that body that whiche ye haue putte on the Crosse . Loke here youre Iuge the whiche is god and menshe ¶ Loke here the wondes the whiche ye haue made hem . loke here the syde the whiche ye haue wonded and dore passed wyth aspere . loke here my handes the whiche bee thorugh nayled for your sake on the crosse . the whiche I haue put oute for to receyue you . hadde it plesed you . And for that case that ye haue cared not for my . And I haue called and cryed after you and ye haue sette not thinge be me . Therfore goo ye in that euerlasting fyre wyth the deuyls of helle wyth all thir company . For one good body shal hem haste for to doo penaunce the whyle that he is alyue . for that he maye bee bocht wyth that tresour his blots . And so that we not be of the iiij . company of Iugement . tho that bee dampnad .

depiction of a column with ropes

AT the fyrst so shal oure lorde shewe the Colūme to all them that haue not bee mercyfully . ther hi so pleniuosly shedde his bloode . wherof that we shullen thanke our lorde . Lyke ambrosius sayd . Plus enim debio tuis iniurijs ¶ O good lorde I am more bounden to the for thy bitter passyon the thou suffredest for me and all mankinde . and ther thorugh I am bought . than I am bounde to the might of almighty for to be made and shapen sholde not haue profyted . hadde I not bee bought . As Bernardus sayd There is noothinge soo profytelyck for to he le the woundes of the soule than many tymes to remember the passyon of oure lorde .

depiction of a crown of thorns

¶ Atte the secunde tyme shal oure lorde shewe his precyous Crowne of thorne the hy bare vpon his hedde . to theym that haue bee prowde . And haue sette vpon ther hedde that whiche they haue plesed the worlde and haue cared nott thynge of hym nor of the crowne the whiche hi bare vpon his hedde for our sake .

depiction of a lance or spear piercing a heart

¶ Att the thyrde tyme soo shal oure lorde shewe the lancie of his passie to them that haue bee angry and haue not loued there euyn cristen menshen . and haue hadde plesur of their mysfortune . Of this sayde Seneca . I wolde that they hatyge menshen hadden eyen for to see in all corners of the worlde . For that the lancie of hating them self sholde thorugh styke or wonde of all holsamhz and of al his fortune . that they haue seen that the menshen hadden For the hatyge people hath also moche payne of the people that haue fortunne . As hy hath pleasure of the mysfortunyge menshen .

depiction of two hands with nails in the palms

¶ At forthe tyme shall oure lorde shewe they nayles of his handes . to theym that haue be couetous . tho that neuer bee satysfyed . To them sayde the apostle . Habentes alimenta &c. ¶ Haue wee mete and clothynge . late vs be conten &c.

depiction of two feat with a nail through them

At the fyfte shal our lord shewe the nayles of his fete to them that haue hadd grete pleasure in daunsyng and haue hadde more pleasure to that than to remembre the passyon of our lorde . And therfore the deuyl shal daunce wyth them in helle .

depiction of an angel holding a cross

ANd at the syxte tyme shal hi shewe that glorious Crosse to them that haue not be pacient in this worlde . & haue wolde not suffre nothinge fore the loue of our lorde . Gregorius sayde to them ¶ Si illic dulcia appetiꝭ necem est vt hic amara tollereꝭe . Desire we the swetenes of that paradis Than is it of nede that wee haue bitternes in this worlde

depiction of a birch and a multi-tongued whip

¶ At the vij . tyme shal oure lorde shewe the rodde & the shorge . to them that haue be Lecherous . there wyth he was shorged and beten . ¶ The whiche Lecherous haue wasted that good of there soule . & haue shorted there lyf wythout chastysing of there bodyes . And for to amende their lyuing .

depiction of a gown or garment

¶ And att viij tyme shal oure lorde shewe his gowne of purperen there hem pylatus wyth clothed . And that whitte gowne there hem Herodes wyth clothed for to mocke him And this shal he shewe to theym that haue be prowde in thir clothing in this worlde with costely furres and also longe tayles on ther gowne haue the wymen and also wydesleues haue they men Also one pulled that other to euyl thoughtes the whiche haue this in syght . Lyke Crisostomꝭ sayd . all those that areye them . for to pulle one that other to synne shullen receyue that euerlastyng Iugement . for they synned gretely in our lord Ihu .

depiction of the head of a male figure or Jesus Christ, blindfolded

That ix . token shal oure lorde shewe to all theym that ther good falsely selle . as fals marchauntes and begyelrs they that there good soo falsely selle in this worlde . That cloth ther his blysed visage wyth was bounde & blynd fyldeth . And tho they beten hym on his necke . & asked in mockyng who hath done that &c. And in this maner ye blynfyldeth oure lorde . And selle your good wyth grete othes and swering falsely and hy is syeng and knowyng all thynge .

depiction of rope

That x. token shal he shewe the cordes there wyh his blyssed handes , and armes where bosnden and tyed . to alle theym that gyue theym self and pulle other peple to synne to lecherousnes and flesly luste .

THat xi . token of his passyon shall he shewe he galle and vinegre that they hem gaue on the crosse . to them that haue mothe eten & dronken . and in especially to they dronkarts . ¶ Lyke raint Lucas sayde in his vi . chaptre . ¶ Ve vobis qui saturati estis . Wherof saint Iheronimus sayde . It is impossybly to fulfylle theym that neuer haue ynowe nor ther belly neuer full in this worlde . And there soule to bee mery in paradys .

¶ And saint Bernard sayde also . So why in this worlde is fulfylled of fleshely lust . is not shorthy to bee spyst of goostely mete of heuen . And Ambrosius sayde . That they dronkarts hurte there natur and lese the grace of god and the glorie of heuen . & to gete the euerlastinge dampnacion .

depiction of the head of a male figure, spitting

THat xij . token shal oure lorde shewe that specksel that thei Iewes spitted in his blissed face . And that shal he shewe to theym that haue blanketted them . and haue them made fayrer . than god them hath made . There of sayth saint Ambrosiꝭ ¶ Deles picturam dei si vultum tuum naturali candore obnubilas et exquisito rubore ꝓfundis &c.

depiction of a hand holding a lock of hair

¶ That xiij . token shal oure lorde shewe his here and berde that whiche the fals Iewes hem pulled oute in his passyon . To them that there here haue coloured and made it crouse . and they wymen their hedde haue discouered for there wyth they men to pulle to synne &c.

depiction of three dice

¶ That xiiij token shal oure lorde Ihesu shewe they dese to the dobbelers or dees players . tho that haue played for lucre & couetous . and not for pleasure . For couetous is in hem self a deth synne . Therfore suche playe ye maye not doo wythout synne . And alle suche goten good may ye not kepe but tourne it ayen to them that it oweth .

depiction of a purse of money

THat xv . token and that laste shall oure lorde shewe the money there wyth he was solde and bought . And that shall he shewe to theym that haue bee vsurers and haue done none restitucie nor gyuen it ayen . ¶ O good lorde what shal saye suche people at the dreful daye of Iugement .

For Iudas gaue ayen they xxx . pens ther by our lorde Ihesu for solde . thorugh couetous . Lyke modyners theues vsurers and robbers . tho that haue other mennes good knowing wythout gyuing ayen . Here of maye ye see in that Decret. Vsurarius non vere penitet nisi prius vsuras restituat The vsurer maye doo none very penaunce . For that he hath gyuen ayen that whiche he hath goten ther wyth . ¶ The cause is . For saint Augustinus sayde . For certayn in his comun regel or orden .

¶ Peccatum non dimittitur . &c. The synnes maye not ben forgyuen afore that that wronful good bee gyuen ayen to theym that it is owyng .

¶ Here endeth this lytill treatyse that whiche is called the xv tokens whiche been late translated oute of frenshe in to Englishe . The whiche been very necessary to euery man and woman to knowe them . And to remembre the dreful daye of Iugement there wee all shullen comen to . And also the passyon of oure lorde Ihu xpi that the not bee loste on vs and maye vs come to stede in our moste nede . And that hy maye brynge me and you all in euerlasting and perpetual Ioye Amen .

depiction of the Madonna and Child, or Mary and Jesus Christ, with a kneeling male figure or monk ¶ And here foloweth the nombre of the fote stappes of oure lorde the whiche he wente in his passion and also other deuote maters . And yf ther bee ony person that wolde saye it were not autentic . Lete hem therfore not bee trobbled in his mynde . for it hath hondred tymes bee more and gretter than men there of can writte &c.

ANd also that wee maye gete after this same lyf a mercyful Iugement . and that we maye escape that dretful wort . go ye that bee cursed of the month of oure lorde &c.

So is no thing better there ayenst than too receyue the passyon of our lorde Ihesu Criste . As bernardus sayde . O ye menshen remembre the passyon of our lorde in your mynde . For yf ye deyed in the

tuosly that it was pyte to see &c.

depiction of a male figure or Jesus Christ being guarded by a group, while a seated male figure washes his hands

¶ Item there fore steppes they oure lorde wente fro annas house to Cayphas house . there was C. and xxx . & betwine the waye soo mocked they Iewes our lorde . xxx . tymes in his blyssed face . and gauen hem . xl . grete strokes in his necke . And they fals Iewes axed oure lorde in Cayphas hous yf he were the sonne of godde and he sayde ye ¶ And in continent they gaue Iugement ouer hem that he was worthy to deye . & do they mocked hem at secunde tyme in his visage xlij . tymes . and gauen hem also xl . greate strokes in his necke the secunde tyme . ¶ And also there wenten they Iewes in Cayphas hous too gyder . they scryben and pharyseen and accorded to gyder who that they wolde deye oure lorde ihu And there was lxvi . of one counseyll of they greatest . in that same nyght .

¶ Item hondred and lxxx . sores hadde oure lorde the whiche he suffcedeth specially in the tyme of hys passyon &c.

depiction of a semi-naked male figure or Jesus Christ bound to a column while two male figures beat him with a birch and a whip; in the background other figures look in at the window

ANd also in the morning erly broghten the Iewes oure lorde wyth CCCC . seruauntes in pylatus house . and ther fote steppes was M And Pylatus sende oure lorde to He rodes house . and there fote steppes was . C. and. l. And pylatus wolde please the Iewes and badde that they sholde shurge hem . for to content ther fals Iewes wyl . And oure lorde Ihesu receyued there vi . C. strokes . and also they woundes they oure lorde there toke they were not well nommerably .

depiction of a seated male figure or Jesus Christ, robed, with wrists bound, wearing a crown of thorns which two male figures press into him with a pole

¶ Item the crowne the our lord was put vpon his blyssed hed hadde lxxij . tackes and the tackes haue been forsquer . and the tackes wente into his Blyssed hedde . and the Crowne was putte twyes vpon his hedde . So our lorde receyued many woundes for our sake . And there wondes they our lord ther receyued of the crowne haue ben onnōmerably . Alsp yf there bee ony that wyl worshippe thyse wondes . the shal saye euery daye xv . pater noster a yere longe &c.

depiction of a male figure or Jesus Christ dragging a large cross, helped by another male figure or Simon or Cyrene; around them other figures including two soldiers and two female figures

ALso oure lorde was beten xxx . tymes doo hy bare his Crosse . And oure lorde felle done to the grounde v. tymes wyth his crosse vpon his sholder . And fro Iherusalem to the hille of caluarye there fote steppes was lxxij . Item fro the hylle benethe to aboue hath ben fote steppes . M. Item the largenes aboue vpon the hylle thee oure lorde was crucifyed haue ben xl . fote steppes ¶ Item doo oure lorde was nayled on that Crosse an bode handes haue ben xl . strokes wyth the / hamer &c. / And tho token the fals Iewes a rope made of here and pulled his fete to the hole of the crosse for it was made to longe . for his fete myght not reche it . and tho they nayled hem his fete / & there strokes haue been lxxxliij &c.

depiction of the crucifixion; a male figure or Jesus Christ nailed to a cross; a male figure is tied to another cross on either side; below, four soldiers including one on horseback and one piercing his heart with a lance or spear; nearby, four haloed figures, including a male figure or John the Baptist and a female figure or Mary

ALso oure Lorde was hangynge on that Crosse iij. houres alyue and. iij. houres deed . and also . l. teeres wepte oure lorde on that crosse . and hondred fote steppes was oure lorde boren fro the crosse to his sepulture or graue ¶ After that same tyme that oure lorde was arosen out of his graue . was hy in erth xl . dayes . Also yf there bee ony man or woman that wyl worshyppe they bloddroppes of oure lorde Ihu the whi che he hath spyldeth for vs here in erth . wyth one pater noster . for hy moste saye euery daye an hoole yere longe C. pater noster . and than sholde bee worshypped euery droppel blots wyth one pater noster . Also they that wolde do this hy shall haue of oure lorde a special grace . And yf ther were ony man or woman that hadde begonne this . and deyed in the fyrst yere he sholde bee waged of the hole tyme of xv . yere &c.

¶ Our lorde Ihesus do hy was croscifyed had by his blyssed vysage to vs westward . Therfore torne we our visage estward whan we doo praye to oure lorde hanging on the crosse .

¶ As oure lorde Ihesus cristis wente to heuen had by his blyssed vysage estward . and prayed his fader of heuen for vs . and therfore praye we also in that este . And therfor late vs praye estward that hy wyl gyue vs after this wretched lyf euerlasting lyff Amen .

¶ Emprinted by me Iohan fro doesborch dwellinge at Anwerpe by the Iron ballaunce &c.

printer's device of Jan van Doesborch (?), featuring an armoured male figure or soldier holding a sword and blowing a horn; to his left hangs an escutcheon featuring a castle; to his right hangs a blank escutcheon; behind his feet a blank scroll